楊千嬅佗男B提早胎教

靚媽楊千嬅早前默認腹中塊肉「有嘢凸出嚟」，昨日她出席活動時承認胎兒是男嬰，更自爆增磅近廿磅。由於體力問題，千嬅決定下月鳴金收兵，開始「禁室」安胎。

雖然高齡懷孕，但楊千嬅最近頻頻挺巨肚出席活動吸金，昨日她便以大使身份出席《第36屆國際電影節》活動。懷孕6個月的她，以橙色連身裙及吋半高踭鞋示人，並自爆已重了16、7磅：「高踭鞋係『道具』，我一落台就換番平底鞋，丁生（老公丁子高）都檢查過O架！」透露懷男嬰的她大呻，因坐骨神經痛而舉步維艱，故出席完下月21日的首映禮後便開始「禁室」安胎：「呢排瞓得唔好，公司都驚我喺活動瞌眼瞓，總之愈早休息愈好。」

目前賦閒在家的千嬅透露，靠看電影及煲劇打發時間：「我咩電影都睇，百無禁忌，親熱戲都冇問題，咪當胎教囉！個仔始終會知道媽咪係做演員嘅！」曾任護士的她又大讚馬國明在無綫新劇《On Call 36小時》中表現出色：「套劇拍得好有真實感，不過當夜更又點止36小時呀！但我依家做緊『金絲雀』喇！哈哈！」談到早前在黃偉文演唱會中一抱泯恩仇，千嬅澄清雙方從來沒仇：「朋友一世在心中，只係少咗約出嚟啫！上台嗰時腰骨痛，都有同個仔講數畀媽咪唱埋幾首歌，都好開心幫朋友完成夢想。（陳奕迅同何韻詩又摸又錫？）陳奕迅不嬲都咁爆炸，換着第二個咁做，肯定畀人摑啦！」

余文樂傍實

至於拍檔余文樂笑言不用丁子高吩咐已主動傍實千嬅：「好大壓力，驚佢宣傳嗰陣突然生得！不過佢好犀利，從未聽過佢話想嘔同嗌肚餓。」他又自認是「丁生第二」：「除咗丁生，我係喺千嬅懷孕期間見得最多嘅人，佢個仔第時出世一定認得呢條『茂里』！」雖然羨慕丁太幸福婚姻，但樂仔自嘲桃花凋零，尚未覓得真命天子，亦否認翻撻舊愛黃伊汶。