阿倫指唐英年「智」弱

近日備受關注的特首候選人唐英年連番爆出醜聞，演藝人士亦極度關注。昨日曾志偉坦言：「佢退選係上籤。」而被指「挺唐」兼已報名選委會的譚詠麟，亦指唐英年「智」方面弱咗啲，強調心目中人選仍未出現。

藝人曾志偉昨日出席公開活動，直言唐英年應該退選特首，他說：「唐生係一個好人，但呢個地步，香港更需要係一個叻人，社會上有太多聲音，如果佢退選係上籤，如果選但又選唔到會係中籤，如果佢選到會係下籤。」他直言若唐英年當選未來幾年會很辛苦，很多市民上街抗議，對香港不是一件好事，志偉說：「特首好似一個導演咁去指揮，仲要有一個好團隊配合。（你參選？）我當然唔得。（邊個得？）未深刻了解過各人政綱，要知邊個對香港最好。」

特首要有正能量

身為樂壇校長、已報名選委會兼被指「挺唐」的譚詠麟，前晚在尖沙咀宣傳新歌《一點光》時，他表示雖然剛從英國回港，但亦有留意近日新聞，覺得「很精彩」和「七國咁亂」，猶如打仗一樣：「自己都未決定投邊個，心目中人選仲未出現，心目中人選係要有智、仁、勇。大前提要為香港好，有承擔和機智，要有正能量嘅光，目前好難搵到呢個人。（佢（唐英年）冇膊頭？）出面啲人咁講，我覺得要畀空間各位候選人。」

問到會否就連日來醜聞對唐英年扣分，阿倫說：「佢『智』方面弱咗啲，爭少少，未夠機智。（投白票？）唔會，仲有一段時間睇吓邊個好。（你參選特首？）唔好搞我，要選都叫曾志偉去啦！」有傳演藝界會全力投唐英年一票，阿倫表示不會理會其他人做法，並說：「日後條路好長，要慢慢去秤。」