Mika狂數錢景峰小器大男人

郭秀雲兒子錢景峰早前被指一腳踏兩船，身為其中一條船的o靚模蕭美卡力數男方3宗罪，澄清是自己飛對方，更自稱是正當人家！

曾與錢景峰拍拖不夠半年的許穎（Phoebe）師妹蕭美卡（Mika），日前與師姐夏然然（Cassie）穿上Tube Top浸Spa，自言遇人不淑的Mika希望洗走霉氣，早日搵個好男人！提到舊愛錢景峰，Mika激動地狂數他3宗罪：「佢小器、大男人，又鍾意晚晚出去蒲識女仔！不過，有男性朋友打嚟搵我，佢就會Check住晒，要我逐個解釋！佢自己識女仔就得，我傾個電話就唔得，我頂佢唔順咪飛咗佢囉！（佢話你借戀情博宣傳？）我比佢更有價值，唔需要咁做！」

「我條件好過Mia」

問到郭秀雲有否棒打鴛鴦？Mika即自稱冰清玉潔，是正當人家，並乘機狂踩錢景峰舊愛陳靜儀（Mia）：「伯母冇反對我哋！我唔似其他人生過仔，我條件好過Mia！」

Cassie亦力撐師妹樣靚身材正，不愁冇拖拍：「佢唔怕冇好男仔追！今次Andrew（錢景峰）真係走寶喇！女仔要好好保護自己，唔好太快投入一段感情，就算鍾意對方，都要睇定啲先囉！」