周家蔚省招牌背夫做Bra妹

將與洪天明拉埋天窗的周家蔚，婚前毅然作出新嘗試賣Bra，更豁出去為設計擔任模特兒示範，不怕未來老公投訴：「佢好大方嘅。」

前港姐周家蔚將於「3．21」嫁洪天明，將為人妻的她決定婚前豁出去賣Bra！周家蔚最近與內衣品牌Bubies合作，推出由她負責設計、以「Romance by JT」命名的一系列內衣，她更會親身上陣擔任模特兒，實行出嫁前來一次終極性感。

並非為錢

周家蔚笑言今次設計內衣實是無心插柳，全因早前出席Bubies活動，言談間與創意總監Nick Chau一拍即合。她日前與Nick開會討論設計，希望幫到姊妹：「我同好多女仔一樣都好難買到合適又舒適嘅Bra，所以一直都想設計啲啱亞洲人身形而又靚嘅內衣，尤其係着晚裝！好多時啲衫走位，黐膠紙都係因為內衣唔啱身，希望自己嘅設計可以幫到班姊妹。」

提到親身上陣示範內衣，事前有否問准洪天明？周家蔚說：「咁又唔使，天明好大方嘅！只要唔好太暴露，以美感同靚為大前提就得。（今次賣內衣想幫補結婚？）唔係！今次唔係為賺錢，純粹係為咗滿足感，婚禮嘅費用全部都係由天明負責。」