on.cc 東方互動主頁

林欣彤許廷鏗 Sing呢等做巨星

「超級巨聲」出身的許廷鏗和林欣彤，去年在樂壇大放異彩，成為「男、女新人王」。經歷一年的洗禮，兩人已變成別人的師兄師姐，他們揚言要繼續在樂壇發光，希望成為真正的「超級巨星」﹗

提起「巨聲幫」就想起「小巨肺」林欣彤（Mag），由比賽到出道做歌手，Mag人氣持續高企，於多個樂壇頒獎禮上橫掃多個新人獎，年僅21歲的她，成績已非常突出！

踏入樂壇的第二個年頭，不再是新人，面對的競爭比之前更大，一不留神便會被身邊人迎頭趕上，但Mag未有為此而煩惱，她選擇坦然面對︰「我冇諗過點Keep住個勢，呢啲嘢唔到我諗，唔喺我控制範圍之內，我只會諗Keep住喺歌藝上進步，就算我唔係身為歌手，呢樣嘢都係我會做嘅事，因為我由細到大都鍾意唱歌！」

獎項不重要

在Mag的腦海中只有「音樂」，沒有甚麼比它更重要，對她來說得獎與否沒有甚麼大不了︰「我唔會在意有冇獎，每個頒獎禮獎項就係得咁多個，但有努力嘅歌手有好多，就算拎唔到獎，唔代表對音樂冇心，拎到獎係幫到事業，但對音樂追求冇影響，成名、賺錢唔代表你成功，成功係你有感動到人嘅作品。」

這個音樂夢在Mag的生命中極為重要，從她的說話已感受得到︰「我永遠都將音樂放喺第一位，我知香港做歌手唔可以只係做音樂，除咗唱歌都想做演員，之前拍過3部戲，覺得係一個挑戰，但唔可以影響到唱歌先得，因為我冇音樂唔得，好多嘢係音樂帶畀我。」

也許只想追夢，令她的想法變得更簡單︰「新一年我只想做好自己嘅音樂，我唔會理外界，自己想做就去做，並唔係為人而做，亦唔係要討好大眾，只係隨心，有靈感就去做，我係為音樂而唔係為錢！」

不可沒信心

對音樂充滿熱誠的Mag，亦有一份執着，這正是她人生中壓力的源頭︰「壓力非常大，因為唱歌我太鍾意，以興趣做職業係好幸福，但我太執着就會好大壓力，試過因為咁成個人瘦晒。」這份對音樂的執着，完全顯露出她是音樂的完美主義者︰「我對自己唱歌要求高，可以話對每粒音都係，身邊人都咁講，但我對呢件事好執着，反而我去做主持拍電影就冇乜壓力。其實有好有唔好，我要識面對，依家學緊令自己進步，同時唔會嚇親自己，唔可以令自己冇信心。」

私生活曝光

娛樂圈就是這樣，只要你人氣勁有話題就成為追訪目標，連私生活也難逃一「攝」，出道年多的Mag感同身受︰「雖然我唔覺得困擾，但我唔想影響到身邊嘅屋企人同朋友，記得最初傳媒喺屋企樓下等我，仲跟我返學，麻煩到家人朋友，如果只係寫我冇乜所謂，我唔係着重人點睇我寫我。」

後記　師兄不是我杯茶

2001年度有兩位巨聲幫在新人獎項競爭激烈，一位是Mag，一位是許廷鏗，雖然她對這位師兄有讚冇彈，但強調對方不是自己那杯茶︰「我同佢係好朋友，佢冇電過我，佢目標係女Fans，上年一個頒獎禮大家同台唱歌，當時好有感覺，但只係嗰刻！」

甫出道便被冠以「將軍澳吳尊」稱號的「巨聲一幫」許廷鏗（Alfred），橫掃2011年度樂壇頒獎禮的新人獎，其歌曲《出走》及《螞蟻》在媒界熱播，Alfred與同門師姐鄭欣宜，以及同屬「超級巨聲」出身的林欣彤（Mag）分庭抗禮，更成為「男新人王」，成績斐然！

經過一年洗禮後，Alfred不再是新人：「第二年通常最難行，好開心舊年好多人重視我哋班新人，就算係競爭，都係良性競爭，唔會計住邊個成績特別好，而我哋私下會傾音樂，冇因為獎項成績而影響友情。」

唱而優則作

要在樂壇站穩陣腳殊不容易，尤其對於升呢為師兄的Alfred而言，需面臨多重考驗。問到會否向唱作歌手進發？他說：「作詞嘅話，我文筆唔係太好，反而會由作曲開始先。（唱作人？）唔貪心，我啲樂理仲爭啲。」

早前推出第二張專輯《Blue藍調》的Alfred，今次歌曲風格甚廣：「老闆都問過我跳舞OK定唔OK，其實可以去學，只係本身個舞功底子差啲。」

兼顧讀牙科

除是歌手身份外，Alfred還要兼顧修讀大學牙醫學士課程，相當忙碌，加上成名後成為追訪對象，問到會否感到壓力倍增？他說：「開始習慣被追訪，我有『巨聲』呢個渠道畀我慢慢鋪路，所以逐漸適應，唔算話有好大壓力。」

作為歌手，除聲色藝俱全外，連IQ和EQ也需兼備，問到是否「EQ達人」？Alfred笑說：「對外面嘅人會好啲，但對屋企人EQ比較會低啲，佢哋對呢行冇乜認識，入咗行身份上始終有改變，但暫時都開心嘅，我出騷佢哋都有嚟睇。（同圈外朋友少聯絡？）大家畢業後都各有各忙。（有冇畀依家大學同學指點？）咁又冇乜，牙科嗰邊好獨立，當然比賽嗰時話題係多咗，但冇乜Hard Feeling。」

緋聞滿天飛

人氣升，是非亦隨之而來，Alfred的感情生活最為人關注，他曾被拍到與女伴溫馨行街，同時又與張敬軒爆「緋聞」，甚至被拍到與男性朋友在公園「親熱」，當時舉動更被戲謔為「微創洗牙」，Alfred笑說：「未聽過呢樣嘢喎！網民不嬲都好有諗頭，已經睇化咗。」問到會否與男性朋友有所避忌？他說：「咁又冇乜喎，都係約埋一班同學玩，我以前讀男校，呢啲嘢少不免，過時過節都係大班Friend一齊玩。」他表示不排除與軒仔有合作機會，又認為兩人根本不需要過於避忌。