何紫綸整容No Problem

為靚為紅 肯脫肯捱

剛加盟Jessica C.與Ana R.經理人公司的何紫綸，面對肯搏肯露的同門，可會不輸蝕行性感路線？她坦言只要夠靚，亦可大方一脫！而為了變得更美麗，她不惜「打針」整容。

事業：似Mix易搵食

模特兒何紫綸（Ann）17歲入行時簽約模特兒公司，約滿後以自由身工作，近期加盟Jessica C.與Ana R.的經理人公司。Ann坦言自由身可控制工作性質，但會被壓價，沒有公司撐腰亦難嗌高價。而她最近加入新公司後，工作量大增：「公司幫我接Job後收入穩定好多，又唔使自己擔心！」

不過公司內大多是外國模特兒，而且身材火辣，Ann似乎是唯一的本地模特兒，問到會否怕被比下去？有「翻版Maggie Q」之稱的她笑說：「我有少少似Mix！好多客都因為咁再搵我！同埋我不嬲Sell骨感，只要性感得嚟靚，行內衣騷都絕對OK！」

港女樣行先

天橋以外，Ann亦是一名形象指導，她坦言有「打針」令顴骨位豐滿，認為女孩子為靚，整容亦無妨，但不主張開刀：「人大咗，骨膠原開始流失，打透明質酸令個樣有啲Baby Fat，望落都後生啲！」並鼓勵女孩子勇於承認整容。香港男少女多，女孩子難覓好對象，Ann指現今的女孩子缺乏自信，要俘虜男人心，除了外表，亦要懂得與男人溝通，她說：「香港女仔有時比較倔，有時要識得詐傻扮懵！唔好一開始就講排場，會嚇走晒啲男仔！」

戀愛：碌爆卡治情傷

曾與張栢芝弟弟張豪龍拍拖的Ann透露，以前戀愛大過天，幻想童話般的愛情故事，4年前夢想破滅，即跌落谷底，失去工作鬥志，她說：「當時太誇張，零收入仲離開家姐同朋友，搬去中環住，啲租貴到捱唔到！」

幸好有姊姊在背後支持，一年後搬回姊姊舊居，惟Ann其後變成購物狂，信用卡碌個不停，她說：「啲卡數真係好多，失戀又唔願做嘢，連儲落嘅錢都使埋，近期先清晒啲卡數！」適逢家中經濟出現問題，她還要與三位姊妹分擔債項，後來恢復工作，財政管理才重納軌道。

夢想做人妻

經過數次失戀，改變了Ann的戀愛觀，眼見身邊朋友結婚生仔，感到歲月催人老，蜜運中的她坦言：「以前愛人愛得咁辛苦，依家會錫住自己，寧願畀人愛得多啲！」但她坦言暫未Ready養育下一代：「我好想生小朋友，但依家考慮多咗，想畀到最好嘅嘢小朋友！」不過嚮往結婚的她坦言心急拉埋天窗，可能隨時閃婚：「年年我都想結婚！」

後記：欠手腕

新公司的經理人對Ann訓示，務必改變低調作風，改以高調行事博見報，而且藝人要懂得交際，惟性格慢熱的Ann說：「我都怕同唔識嘅人講嘢，有時啲人唔熟，都會怕咗我o架！」樂天的她經常面帶笑容，其實相當可親。