黃雪瑩樂做菲機友

模黃雪瑩（Suki）一向有收藏相機的習慣，家中有逾十部，特別鍾情菲林機，她喜歡菲林每次可以影出不同效果，閒時更愛上網睇相機，自詡沉迷相機的程度似足「龍友」。

喜歡收藏相機的模黃雪瑩，不管對任何品牌種類的相機都有興趣，自16、17歲開始，喜歡影相的她隨身攜帶相機：「我每次會帶菲林機同數碼相機，見到得意嘢隨時影低，相機唔喺身會周身唔自在。」

雖然她喜歡菲林相片的效果，不過亦曾經擁有數碼單鏡反光機，她說：「五、六年前未有好多女仔成日孭住部大機周圍去，當年我孭部大機出街，成日畀人望，加上部機又重，漸漸少用，後來都賣咗佢。」

沖曬費‧好乸脷

Suki經常上網刨相機評論，自稱行為十足「龍友」，現時擁有十多部相機，包括手動菲林、自動菲林等各類型，她說：「我好鍾意儲Lomo，夠輕，又多款式。」雖然Lomo機價錢不貴，但菲林與沖曬費卻十分昂貴：「我每次都會儲十幾筒菲林先拎去沖，不過有時去一次旅行都會影好多筒，上次去塞班島都影咗十幾筒菲林。」

讀書期間，Suki會儲錢買心頭好，畢竟這是一個奢侈的嗜好，她說：「以前讀書成日儲錢買相機，亦會賣相機同鏡頭。有時買二手鏡頭平好多，可以玩多幾部相機。」問到至今投資的金額，她估計大約花了六萬元。

最珍惜‧第一部

經常上網研究相機的Suki，每次買機前都親自試機，但提到一部令她曾經後悔的相機，她說：「曾經用咗三萬幾蚊買咗部數碼相機，不過買咗先發現影啲相太人工化，又唔係菲林，卡咗喺中間。」她始終覺得菲林機最好，即使舊機也可以用上一段時間，質素較好。

雖然Suki儲相機的年資只有七年，手上曾有多部轉讓，但對第一部卻珍而重之：「呢部Canon菲林機係朋友介紹買，雖然二手，買番嚟千幾蚊，但讀書時期冇咁多錢，第一次儲錢買嘢始終開心啲。」至今她買了無數相機，唯獨這部相機從未打算出售。

留住變幻天空

Suki最愛影景物，隨身帶備菲林機，隨時Snap，更對天空情有獨鍾。她坦言最喜歡變幻莫測的天空：「我鍾意個天永遠都唔會一樣，每一刻都改變緊，睇住啲雲點凝聚都好得意，而且菲林影出嚟，每次都會唔同。」愛美是人的天性，Suki為了不錯過靚景，隨身帶備兩部相機隨時拍攝，將最美回憶留住。