Mika揀仔小器No Way

接棒殺入模界的許穎師妹蕭美卡（Mika），目標與身材一樣「唔嘢小」，擁有33C上圍的Mika被指貌似溫碧霞及張馨予，她亦自信爆棚，揚言要大紅大紫，一於向舊愛郭秀雲兒子錢景峰示威，實行「活得比你好」！

分手「反轉豬肚」

Mika指去年與錢景峰拍拖數月，但以「錯晒」形容這段關係，分手後她狂喊又要停工，自此不再相信異性的甜言蜜語：「以前收情書會好冧，但中過招後，冇晒信心，依家都多人追，但會花更多時間睇定啲。」

回想去年情人節獲錢景峰送驚喜，今年則要單身過節，Mika難免感觸：「當時佢喺美國，夾好時間派人送親手整嘅玫瑰裝飾同公仔畀我，好Sweet！可惜之後佢現晒形，我哋狂嗌交。」她忍不住直斥錢景峰大男人又自私，對她諸多管束：「佢會講啲針對性說話Hurt我，覺得做Model唔三唔四，但佢都同Model拍過拖！（佢花心？）貪心同貪新鮮。」她自言經此一役學懂堅強，又表示暫時不想拍拖，即使日後擇偶，首要條件是體諒她及不小器。