Baby漏口風爆熊黛林快嫁

Angelababy與熊黛林（Lynn）各自手執「鑽石筍盤」，正當盛傳兩人分別快嫁黃曉明及郭富城之際，為免婚訊打爛飯碗，齊齊推莊發表不婚宣言。可惜如意算盤打不響，Baby口疏指Lynn好快做人妻！

男友分別是內地一線小生黃曉明與舞林天王郭富城，分屬同門的Baby與Lynn得以「妻憑夫貴」，聲價十倍。縱然兩人從未把戀情宣之於口，但她們的婚訊近日愈傳愈盛。眾所周知，Baby與Lynn向來是廣告商的寵兒，為免被突如其來的「婚訊」打爛飯碗，兩人向來不理傳聞真偽，一於死口唔認是人妻。

Baby與Lynn前晚出席所屬模特兒公司Style的春茗時，不斷被追問婚訊，恐防被刺中要害，兩人再三澄清未懷一顆恨嫁的心。不過，Baby席間擺師姐上枱，踢爆年屆31歲的Lynn一定嫁得快！當被問到跟Lynn誰會較快結婚時？Baby即說：「好似跑馬，我祝Lynn快啲！」Baby有口爆人，卻繼續對自己的人生大事封嘴，不但強調冇諗過結婚，更表示從來沒有人向她求婚：「冇人求過呀！自己都未有心理準備！」

若有囍訊唔會隱瞞

對於與曉明的假婚書在網上瘋傳，Baby被問到是否有人叫她做「黃太」？她緊張地說：「冇！唔會！嗰個證好假，香港同台灣人見到可能以為係真，但內地人一睇就知係假！」Baby還說出心裏話，表示經理人惟恐婚訊影響其事業，面對廣告商要見招拆招：「對我冇乜影響，但經理人收到好多電話，有廣告商更打畀佢問真定假！」她坦言拍拖愛得辛苦，所以拒絕選擇秘婚，Baby說：「結婚會講畀大家聽，唔會隱瞞。拍拖都咁避忌，結婚唔會再避！（畀人影到情人節探曉明班？）我好驚發福，因為甜，唔敢提！」她又晒命指情人節收到很多禮物，更於微博上載靚花照，但不願透露是否曉明所送：「費事畀人話，但係好開心嘅禮物！」

至於Lynn與Baby一樣，怕婚訊影響飯碗，問到是否龍年結婚即落閘：「梗係冇咁快！呢個傳聞對我影響好大，啲客怕我婚後會退出，我仲有好多工作嘅計劃！」但她表示即使婚後依然會工作，咁講擺明想「打定底」！