Niki陷火海拍劇冇買保險

周麗淇昨晨於長沙灣工廠區拍劇，吸引多名學生圍觀，她亦識做地向學生打招呼。對於劇集不乏驚險及動作戲份，昨日更有火燒車場面，未有買保險的她笑說：「有咩TVB要養我！」

周麗淇（Niki）及高鈞賢等昨晨於長沙灣工廠區拍攝劇集《女警愛作戰》爆破場面，Niki身在警車之內，劇組則在車外放火，場面驚嚇！Niki說：「呢場戲講有個傻佬專門針對我、要攻擊我，想攞我命！（親身上陣？）都有少少驚o架！我怕會爆玻璃，彈落塊面度！」

拒絕替身代上陣

對於劇集有多場驚險戲，Niki竟笑言未有為自己買保險：「我諗TVB會幫我買啩，點買我就唔知喇！最好唔好有啲咩損傷，我又未結婚、又未有男朋友，有咩TVB要養我！」經常親身上陣的Niki透露，監製亦曾叫她找替身上陣，不過被她拒絕：「我覺得用替身表現唔到真實反應，所以咪親身上陣囉！」

Niki又指前幾日曾拍被綁架於車內的場面，當時更全車起火，而她又將會於大廈外牆吊威吔上陣：「我3、4層樓都唔怕嘅。（驚唔驚？）期待！」她多番挑戰驚險場面，問到是否想做打女？她笑說：「我鍾意動作片！（唔錫身？）錫身唔好睇！其實監製都有叫我小心，因為驚我整親拍唔到，哈哈！」

高鈞賢挑戰難度

至於同場的高鈞賢則透露首度着制服拍劇，喜歡挑戰動作場面的他表示，有場「跳車」戲令他最難忘：「嗰場戲講我追賊，我要跳過架手推車，本身我話想借位，不過到最後個位就唔啱，我焗住要跳，好彩都跳得過咋！」齋聽都覺好驚喎！