Ivana軒仔呼籲行善當習慣

歌手張敬軒、王菀之及DJ阮小儀早前到肯尼亞作探訪，他們表示香港人的善款能幫到當地人，並呼籲大家要把做善事養成習慣！

張敬軒（軒仔）、王菀之（Ivana）及小儀身為本年度的「饑饉之星」，早前一同到非洲肯尼亞探訪6日。提到旅程中的難忘事，三人滔滔不絕，軒仔說：「最難忘係當地嘅BB！因為近年有唔少朋友生BB，所以自己對BB嘅Size都比較敏感，有好多我以為得幾個月大嘅小朋友，原來已經2、3歲，你唔會想像到佢哋嘅手臂有咁幼，幼到好似骨一樣！」他更慨嘆當地的醫院衞生條件欠佳。

小儀為母愛動容

而向來自認堅強的Ivana，作家庭探訪時不禁落淚：「個家庭有8個小朋友，佢哋要Share着半隻鞋，佢哋着嘅衫褲爛晒，冇一件完整嘅衫！屋入面咩都冇，食嘅嘢你唔會分得到係泥定係菜乾……我真係忍唔住喊咗出嚟！」至於小儀亦同樣眼濕濕：「我喊係因為覺得母愛好偉大，個家庭只有媽媽支撐住，佢堅持唔賣自己嘅小朋友，死頂都會養大佢哋！」

Ivana表示今次探訪，見證香港人的善款真的能幫助當地居民：「香港人好有善心，幫到好多人，希望大家做善事唔係做一次就算，可以變成一個習慣！」軒仔則說：「探訪完佢哋，我覺得平時面對嘅困難都係小事，因為我哋至少食得飽！」