吳雨霏：試過戶口係$0

吳雨霏（Kary）生於小康之家，但父親在她12歲時破產，令她學懂金錢的重要。雖然獨立發展後曾一個仙都冇，但她發憤工作及儲錢投資，去年成功榮升業主，還定下兩年後置千萬豪宅的目標。

爸爸破產嗰陣，我只係得12、13歲，但唔驚亦唔介意人哋知。爸爸都幾Open，雖然嗰排都好唔開心，但佢同自己講五年後翻身、穩定番落嚟，佢又真係做到，所以好Proud Of佢！當時爸爸孭住頭家，又欠人好多錢，父母唔想仔女擔心，我只係知由大屋搬細屋，再由細屋搬再細屋，但又唔可以用坎坷嚟形容，至少我仲有書讀，只係生活有轉變，同埋媽咪從來都冇半句怨言。

目標兩年後再買豪宅

入行頭幾年真係冇賺過錢，蝕多過賺，慶幸當時屋企冇壓力要我幫手養家。依家賺到錢都會畀番啲家用，初頭佢哋都話唔使，我覺得作為仔女係需要，出道冇錢顧慮一定有，睇咗幾年冇乜收入，冇錢就好直接同爸爸講，我收入點佢最清楚，因為出糧都係畀晒佢。Cookies年代仲有收入，但自己一個發展後係最難捱，好Up & Down，試過戶口係$0，又唔好意思問爸爸攞錢，好感激爸爸支持！媽咪開頭唔想我入行，因為當時得15歲，最後佢同爸爸傾掂，若然我個女15歲時想入行，可能我都未必畀。

依家我嘅理財都係畀晒爸爸搞，我舊年成功置業，依家裝修緊，應該用嚟收租。其實我哋呢行冇乜安全感，好難得先有機會搵到錢，因為唔會知今年定下年賺唔賺到錢，當你有呢個賺錢能力嘅時候就要儲起佢，層樓依家仲供緊，第時乜都冇都可以揸住層樓，希望兩年後再買第二間千萬豪宅，已經諗好喇！媽咪曾經講過：「女人點都要有瓦遮頭！」依家成日都記住呢句，目標嚟嘅！第日一間住、一間收租。

搵男朋友要老竇鍾意

其實我家庭觀念好重，乜都以家庭為先，我同屋企人好似好好朋友咁乜都講，感情事都會講，唔會收收埋埋。父母都好開通，我試過帶男友返屋企食飯，我覺得爸爸有啲擔心，但佢從來都唔會話唔鍾意呢個男仔，只要我鍾意佢就鍾意。不過如果我知爸爸唔鍾意，我覺得我會同男友分手，好尊重佢諗法！佢真係講得出嘅話，可能呢個男仔都唔係咁好。（全文完） p:九年十八變

筆者看着Kary出道，不經不覺認識近10年，初相識的她極度孩子氣兼毫無造型！印象中的她甚少受訪，全由其他拍檔代答，幸好樂觀性格不愛爭寵，經過九年的磨練，Kary愈來愈有女人味，同時自信心亦大增，雖然被指整容，但她任由筆者檢查，以證真實。