DaDa代出頭狂數負心漢
o靚模界咪神陳靜(DaDa)昨日出席活動,提到同居密友「E Cup教主」鄧伊玲(阿旦)慘遭無綫主持黎國輝(阿感)狠撇,竟仍被蒙在鼓裏時,她即大發雷霆炮轟負心漢!阿旦昨日竟與舊愛狹路相逢,幸得DaDa幫手解圍!
陳靜(DaDa)師妹阿旦與拍拖超過5年的阿感,早前感情出現危機,女方更已搬離愛巢,與DaDa同居互相照應,但兩人還未正式分手。豈料阿感於農曆新年前突然於微博發表宣言狠飛阿旦,此時女方才得知已被叮出局,情緒直插谷底!
DaDa與同門林宜芝(Monna)自然為阿旦抱不平,昨日三女出席內衣品牌bla bla bra活動,雖然她們以內衣造型示人,但阿旦與擔任主持的舊愛阿感同場,難免觸景傷情,兩人不願合照外,阿旦全程更強顏歡笑!對於突然被狠飛,阿旦說:「好突然!冇正式講,不如你哋幫我問吓佢!」問到為何狠飛阿旦?阿感黑面堅稱二人仍是朋友。而首度穿內衣做開幕嘉賓的DaDa,自爆去年收到粉絲送的內衣,感到有點尷尬。
「點解扭曲事實」
DaDa不忿同居密友慘食「無情雞」,昨日接受本報訪問時扯火怒轟阿感︰「阿旦好唔開心、喊咗幾日!唔明點解佢(阿感)要喺微博度Hurt佢!佢哋呢一年發生好多問題,不過阿旦仲好珍惜呢段感情囉!」
DaDa愈講愈激動,不忿阿感於微博暗示自己才是受害者:「點解個事實會畀人扭曲?講到自己係受害者咁!當事人(阿旦)唔知發生乜事,好似喺度屈佢咁!」她更指阿感應為阿旦澄清,做個負責任男人︰「希望佢快啲出嚟澄清,唔好畀人誤會阿旦!每個人講嘢都要負責任,就算分手都應該係和平,唔好講嘢不負責任!」
Monna爆有第三者
提到阿旦與阿感昨日同場,DaDa指好姊妹情緒低落,不過只能死忍,她不禁慨嘆︰「我知阿旦其實好唔開心,不過我私下叫佢忍住眼淚,唔好畀男人睇死,希望佢唔好浪費時間!阿旦仲有好多嘢喺個男仔度,我唔排除會約佢哋講清楚!」
另一邊廂,同門姊妹Monna亦替阿旦不值,更暗指男方有第三者,她說︰「其實之前有朋友話畀我知,佢(阿感)身邊有好多異性囉!成日都公開對啲異性咁好!」
![](/img/v2/title_pic.png)
![](/cnt/entertainment/20120210/photo/0210-00470-001b1.jpg)
活動上,情傷阿旦(左)與陳靜落力獻技,看來心情未受影響。
![](/cnt/entertainment/20120210/photo/0210-00470-001b2.jpg)
阿感與阿旦於分手後狹路相逢,二人明顯互當透明!
![](/cnt/entertainment/20120210/photo/0210-00470-001b3.jpg)
DaDa向來不平則鳴,好姊妹被恰,她當然不會坐視不理!