吳雨霏信自己：冇需要整容

吳雨霏（Kary）出道時慘被封為「大鼻妹」，Kary自爆思想開通的父親曾問她是否需要整容，當時只得15歲的她曾心動想削走鼻頭肉，但得悉大鼻是旺財兼旺夫後即打消念頭，並強調從未在身體注射整容物料及液體。

畀人傳整容對我嚟講係好事，講真，等咗九年先有人話我整容，覺得自己係順眼咗，靚唔靚見仁見智，但我覺得比起Cookies年代順眼咗，嗰時都未發育齊全，仲口腫面腫，依家25歲都應該齊全，樣呢啲嘢其實係信心嚟嘅，多人讚、識打扮行出嚟都唔同啲，好多嘢係由內浸出嚟，加上自己有努力過，又勤力睇雜誌有關Fashion嘅嘢，花好多心機同化妝師、髮型師、形象指導去研究點樣每次出嚟都靚啲，呢啲嘢幫咗我好多，以前柴娃娃少女冇乜形象揀，依家慢慢開始有番自己形象，所以開心o架，唔係靚，但唔係醜，已經好滿足。

爸爸力撐執靚樣

依家仲好多人講我係大鼻，嗰時9個女仔冇辦法，拍埋一齊一定有比較，冇可能比較唱功o架，咁就比較個樣囉，我身邊好多朋友都去咗整容，如果令自己有信心、開心我會接受，但係我自己真係冇咁嘅需要，或者第日老咗有皺紋就唔知啦，呢一刻我覺得唔需要，乜都冇打過、冇整過，反而爸爸問過我工作需要使唔使整o架，佢好明白呢行運作，佢話冇所謂，我都畀佢嚇一跳，究竟係咪講真？相信爸爸真心想我好，佢真係同我講依家整容好易，需唔需要整呢樣整嗰樣，我反而諗點解爸爸咁支持。

入行時有諗過整細個鼻，之後聽好多人講鼻頭有肉係福鼻同好有錢，我驚整完冇錢同唔旺夫，人大咗會覺得生得出嚟就要接受，個天畀你咁樣係有原因，冇理由唔去愛惜自己，要學識接受，如果真係要整直啲就會好巨，冇諗過要隆胸，我只係歌手，唔係模特兒，唔需要太誇張，就算係整，但啲歌唔得都係唔得，做好音樂先，順眼就得，依家轉型都轉得幾好，好多廣告搵我做嘢，有時會諗其實自己都唔係咁差，都OK啦！（明日待續）

口述：吳雨霏 筆錄：火品木