杏兒罰爛蒲宗澤 送車扭耳仔

本報早前拍得黃宗澤夜蒲時爛醉兼畀女圍，享盡艷福！前晚其女友胡杏兒出席新車發布活動時，笑言要扭他耳仔，並罰他送名車賠罪！不過，她不忘為男友「補鑊」稱受歡迎是好事，難怪鄭嘉穎大讚她是好女友！

胡杏兒前晚偕鄭嘉穎出席全新BMW 3系新車揭幕儀式及派對，與價值逾70萬元的新車上演一幕「香車美人」。忙於在內地拍劇的杏兒，被追問男友黃宗澤夜蒲畀女圍一事，她有備而來地說：「我係知情嘅，佢唔係趁我唔喺度先出去玩，我畀佢好大自由度，嗰啲係生日朋友，普通傾偈係社交禮儀，佢鍾意做咩就做咩，冇所謂。」

嘉穎大讚好女友

問到會否要黃宗澤扭耳朵，杏兒撒嬌說：「係啦！罰佢買呢架車畀我呀！不過，其實畀女圍都好普通，做呢行最緊要受歡迎，咁樣都好。」在旁的嘉穎即插嘴：「揀女友呢啲好，夠大方！」杏兒又踢爆黃宗澤因被偷拍而感到很瘀，故會勸他少飲為妙，而情人節禮物早已收到。

至於嘉穎則否認在橫店拍劇時，舊愛佘詩曼到其酒店房「探望」，他沒好氣說：「呢啲新聞都好信，寫到冇嘢好寫，下次應該寫結婚生埋仔！都唔知故事發展落去係點，我自己都跟唔切，費事理！」他強調二人沒有愛火重燃，現時感情生活是零，一切隨緣。問到豈非等運到？他搞笑地說：「唔通出去飲到爛醉畀女圍咩？」令杏兒哭笑不得！而出席活動的還有模特兒Jocelyn與丈夫、何佩瑜、汪詩詩與汪圓圓等。