Kary否認逼走Kay：我冇咁大影響力！

吳雨霏（Kary）去年轉投環球，傳出與謝安琪（Kay）爭做一姐，令「雙K」頓成「傷K」！獲環球力捧的Kary橫掃各大頒獎禮，有指令「死敵」Kay提早解約鬆人，不過Kary坦言沒有本事逼走Kay，而有關其感情、家庭及生活點滴，將一連五日與粉絲分享。

講真唔係好清楚佢哋（謝安琪同環球）嘅狀況，自從加入環球，傳媒成日攞我同Kay比較，事實上冇需要去比較，大家都互相支持。唔清楚Kay嘅去向，覺得公司同每個藝人都有唔同嘅計劃，無論點，公司都撐旗下藝人，確實公司畀咗好多支持、資源，畀我去做想做嘅嘢，唔覺得公司特別撐自己，公司個個都撐同錫。

近排有好多是是非非嘅報道，我諗大家都唔想，我覺得好無奈，相信佢都會覺得無奈！不過我明白呢啲報道，因為大家同一間公司，同埋佢經理人最近同公司嘅事，我希望呢啲新聞可以告一段落！唔想傳媒焦點放係是非上面，真係好影響我哋關係！我哋唔係成日合作，之前唔同公司，入咗環球又冇乜機會合作，所以唔可以話好熟，朋友囉！做嘢上比較少接觸，見到面會傾偈，大家真係冇嘢！

「傳短訊叫佢加油」

之前話公司唔想得失任何一方，獎項方面都要一樣，喺我立場咁咪好囉！睇得出公司個個都錫，坦白講獎項係大會覺得我值唔值得畀，唔係公司決定，公司個個藝人都撐、希望藝人好，話我唔去睇佢個演唱會，其實我真係唔舒服同有做嘢，我有傳短訊畀佢叫佢加油，好多時我哋做嘅嘢唔需要次次都講出嚟，自己心知就得。

最好笑話我哋爭做一姐，坦白講輪都未輪到我啦！公司仲有莫文蔚、陳慧琳同好多歌手，首先唔知Kay去向係點，如果佢真係離開，當然最緊要佢開心，同埋做到佢想做嘅音樂。我冇同佢傾過解約問題，好少講到咁深入，我又唔想咁八卦，佢想講咪講囉！加上又唔知佢實質上係點，我相信大家都唔想搞到唔開心，最好方法係和平解決問題，有報道話佢走有少少因為我，我覺得自己冇咁大影響力，佢走梗係可惜，真心覺得同一間公司唔一定要打打殺殺，大家可以做好嘅音樂，佢係實力女歌手，相信公司對佢都冇嘢，只不過方向唔一致，我唔知啦！大家見到面都唔會刻意去避，我好大方。

轉會爭女歌手獎

轉咗環球四個月有咁好成績，我好滿意，出咗一張碟、接咗好多廣告同好多騷，年尾頒獎禮成績又好，對我今年計劃信心大咗，我同公司都會喺今年繼續衝。完咗頒獎禮，老闆、我同公司同事都坐低傾嚟緊嘅計劃，大家都好想、好認真去做好多嘢，希望今年出兩張碟，上半年會積極做一張碟！今次創作上會花多啲心機，以前比較隨心去做創作，今次會花多啲時間寫歌，出嚟表演都可以彈吓琴同結他，呢幾個月要學番樂器。入咗公司四個月，真心覺得係一間團結嘅公司，同事、老闆、歌手都互相撐對方，我覺得好Warm。今年希望向住女歌手獎進發，不過唔想淨係睇住個獎去做嘢，希望Upgrade自己，喺環球四個月，好多嘢都係慢慢建立，要一啲時間，獎係動力，始終入行九年，又開完紅館演唱會，今年想再行前多一步，知道公司已經入紙申請。

「宿敵」謝安琪有壓力

謝安琪獲「宿敵」Kary大讚是「實力女歌手」，即答謝對方，坦言早前對爭做一姐的報道感壓力：「真係擔心過影響友誼！加上又唔知佢個心點諗，所以我私底下好主動、積極同佢傾，發現大家都明白件事，完全唔會尷尬，我哋從來唔存在競爭。」她又大讚Kary思想正面：「雖然我哋好少見面，但每次傾偈都覺得佢個人心術好正，諗嘢正面。（覺得Kary成為你同公司不和關係嘅犧牲品？）新聞嘅嘢控制唔到！對佢好有信心

Profile

原名：吳家穎

英文名：Kary

出生日期：09-06-1986

星座：雙子座

身高：1米67

體重：47kg

嗜好：唱歌、跳舞、打籃球、打網球

家庭成員：父母、弟弟、妹妹