糖妹阿Q夠EQ

有甜姐兒之稱的黃山怡（糖妹），去年工作不斷，除了與糖兄舉行音樂會外，糖妹還替無綫擔任主持工作，但糖兄妹在勁歌頒獎禮意外地毫無收穫，難得糖妹不介意，並發揮阿Q精神說：「咁證明係公平！」

唱作組合糖兄妹成員糖妹，雖然身高不足五呎，但勝在樣子甜美討好，加上性格爽直，火速成為宅男至愛！變身「女神」後，糖妹工作不斷，拍廣告、舉行音樂會、為電影配音、替無綫節目《甜姐兒》及《勁歌金曲》擔任主持等，幾乎沒有休息空間，惟糖妹相當捱得，她認為多勞多得。

演舞台劇放笑彈

總結去年成績，糖妹謙稱以「不過不失」來形容：「音樂方面要再努力啲，但好開心可以同糖兄舉行售票音樂會，起碼場館都坐滿，對我哋嚟講，係打咗支強心針！」去年糖妹的曝光率不俗，風頭完全蓋過糖兄，因而被指忽略了糖兄，糖妹說：「大家完全知道發生乜事，糖兄一向好閉關，埋首做音樂，佢舊年係『播種期』，今年將會係『收成期』！」問到頒獎禮成績是否較往年遜色？糖妹說：「冇話遜唔遜色，我哋享受過程，頒獎禮除咗係攞獎，最緊要可以同大班歌手朋友聚會，有啲好耐冇見嘅歌手，喺頒獎禮撞番，大家就不停吹水，研究有乜新嘢玩。（少獎失望？）唔會，若然成日諗點解冇獎，倒不如向前看，做好啲成績畀人睇。」足見糖妹EQ及IQ兼備，相當襟撈！

事實上，糖妹確實忙到爆，除了音樂方面外，她還兼任電影配音，以及為無綫主持《甜姐兒》及《勁歌金曲》。當外界以為糖兄妹在勁歌頒獎禮上必有斬獲，豈料全晚「食白果」，難得糖妹不介意，她說：「證明係公平，其實舊年嘅成績又真係唔值得攞獎，仍然有進步空間。（睇得開？）都算嘅，寧願戥我唔抵冇獎攞，好過攞咗之後話唔值得攞，冇咁大個頭唔好戴咁大頂帽，呢方面我好理解。」

今年除了繼續出碟外，糖妹還有意參與舞台劇演出，她說：「係有傾過，（諧星天分？）我幾鍾意搞笑。」另外，她透露新歌《留不下來》是一首勵志歌，講述年輕人長大後闖天下的感受。

冇人追恨要桃花

談及感情狀況，糖妹表示仍然Dry到爆，加上緋聞少之又少，令她倍感無奈：「冇辦法，但我寧願多啲嘢做好過多緋聞嘅。（有冇人追？）都冇。（擔心同合作嘅金剛傳緋聞？）唔擔心，因為我唔想嫁去異地。」糖妹亦「恨」有桃花：「做我哋呢行係需要桃花，人緣都係桃花一種，再多啲人緣運就好，最好覆蓋大中華區，哈哈！（買粉紅色水晶催旺？）咁又冇，呢啲隨緣就得，順其自然啦！」

後記 敏感情人

元宵及情人節將至，對仍屬單身的糖妹而言，別有一番滋味。她坦言對節日相當敏感：「曾經試過因為掛住做嘢，而唔記得咗同舊愛嘅紀念節日，嗰刻好想摑自己，好自責！」