陳豪呆樣表癡心 阿佘對偉仔最冧

如果畀你揀，你會揀筍盤陳豪還是電眼梁朝偉做理想情人？佘詩曼獨愛梁朝偉，至於名草有主的陳豪冧爆高呼「Aimee」：「因為得呢個！」

過完新年，便踏入2月最浪漫的戀愛月份，既有元宵佳節又有情人節，不過要製造浪漫當然要花點心思，就等《天與地》三位主角教你如何在佳節使出冧招，過一個最窩心的情人節。

雖然佘詩曼與緋聞男友鄭嘉穎傳翻撻，不過阿佘揀理想情人時未對嘉穎「動心」，反而揀了已為人夫的梁朝偉，她說：「佢嘅魅力由心發出嚟！同埋佢嘅電眼實在太迷人喇！」問到如何度情人節最浪漫？她說：「我覺得好簡單，只要嗰個男仔你係好鍾意佢，點樣過都係會好開心，最緊要係有呢個人出現，依家我暫時未遇到。」阿佘又回憶十多年前跟一位男子拍拖，對方總會為她花盡心思，包括用鐵線製成她的英文名字、畫畫和砌心形圖：「其實男仔只要花少少心思，做咩事個女仔都會好開心，我覺得男仔講咩說話最冧？就係『有咩事我會喺你隔籬』。」

另一邊廂，陳豪被視為「筍盤」，是不少女士的理想情人，問到是否一條心揀女友Aimee（陳茵媺）？他說：「梗係啦！因為得呢個！（有咩冧招？）其實我唔識，我覺得唔修飾係最好，代表最真心。」記者着他擺個冧女Chok樣，但他卻一副呆樣來代表自己真心一片。

黃德斌Fall in love

至於與女友拍拖多年的黃德斌，同樣是個愛情悶蛋，他覺得拍拖感覺像老夫老妻，要他揀理想情人，他說：「阿佘啦！因為同佢合作熟啲！相處過程覺得佢個人好好，做事幾有堅持嘅女仔，我好欣賞佢嘅工作態度。（情人節用過咩冧招？）你問我呢啲老人家真係唔識㗎！我同女友已經拍咗咁多年拖，唔再用咩招數，試過送花畀女友囉！（同佢講咩冧句？）梗係日日都希望同佢Fall in love啦！」

葉翠翠和欣宜都挑選陳豪為理想情人，曾與陳茵媺合作、視對方為家姐的欣宜說：「我揀『姐夫』，因為我相信家姐眼光，陳豪係一個筍盤，高大又穩重。」而葉翠翠亦希望將來找個感覺似陳豪的情人：「佢係一個好好嘅人，好有耐性同風度，感覺呢個人好可靠，我都想搵呢類咁忠厚嘅情人。」