祖兒基仔領軍撈起 進帳十幾萬

前晚樂壇天后容祖兒盛裝現身跑馬地，與古巨基、Twins及杜汶澤等同門藝人參加英皇娛樂新春團拜，並起筷「撈起」美食寓意「愈撈愈掂」！老闆楊受成更大派十幾萬元利是，令眾人滿載而歸！

祖兒與基仔前晚盛裝參加英皇娛樂的團拜晚宴，然後唱K直落，盡興而回！老闆楊受成甫到場，二人與Twins、陳偉霆及杜汶澤等即時上前，醒目地大講好說話拜年，又互相派開工利是，令氣氛非常熱鬧！

放年假開食戒

入行後首次在港放年假的祖兒，自爆遊勻港九新界拜年，由初一食到初七，她說：「新年期間只係返咗內地做一場騷，同喺香港錄咗一首歌，見咗好多親戚朋友，走勻全港拜年逗利是，可謂滿載而歸。（新年願望？）梗係希望我擔正嘅新片《DIVA》大收旺場啦！」在旁的電影監製杜汶澤即揚言對該片充滿信心。最近有傳祖兒擁有價值逾2.2億港元住宅及地舖等物業，但因樓價跌而爆煲，經理人霍汶希（Mani）代為否認：「祖兒根本冇舖位，亦冇8間屋咁多，對於呢啲失實報道不作回應。」

阿Sa蘇梅拍拖

至於基仔則開心地表示，有廣告商邀他做代言人兼擔任導演，令他圓夢向導演界發展。而Twins成員鍾欣桐（阿嬌）於新春期間，飛往加拿大向契老竇導演劉鎮偉拜年，好姊妹蔡卓妍（阿Sa）則與男友陳偉霆出埠，拍拖到蘇梅曬太陽！逗過開工利是後，Twins即收拾心情開工，阿Sa透露Twins稍後將推出廣東碟：「公司好揼本，搵咗同中島美嘉合作過嘅日本團隊NAM合作，希望令大家眼前一亮。」