林峯Chok出鬚根求突破

林峯昨日以鬚根粗豪Look現身新城團拜，笑言要行Man Chok路線，踏入新一年，他希望有桃花人緣運，得更多人鍾意。

林峯昨日率領英皇師妹鍾舒漫（Sherman）和泳兒出席新城《壬辰年新春團拜》，吸引大批粉絲撐場，以鬚根Look現身的林峯說：「過幾日要開劇，角色滄桑少少，第一次做粗豪角色行Man Chok，大個仔踏入3字頭，要嘗試唔同戲路。」去年跟潘霜霜分手，問到桃花是否需要試不同味？他笑說：「呢行都需要桃花、人緣，做幕前想多啲人鍾意。」

家人冇逼相睇

農曆年回鄉過節的林峯，被問到家人有否安排他相睇？他說：「冇啦，屋企之前有白事，冇乜點去拜年，只係食大咗個胃收唔到，要快啲減肥。」對於網友惡搞監製莊冬昕新歌《食軟雪糕》，林峯說：「音樂其實冇界限，每首唔同風格作品都有佢特色，我覺得呢首歌幾得意，編曲幾好。」

至於泳兒表示初三已開工，到內地做樓盤騷：「今年新年開得幾好，自己都勤力儲錢買樓。」而到台灣跟家人過年的Sherman亦希望在當地置業。此外，新城董事總經理馬健生和音樂、娛樂及製作總經理朱明銳表示，新城投資逾億元開設三條數碼頻道和五個數碼廣播室，並於3月公開招聘DJ，趙碩之亦自薦主持播歌節目。