朱晨麗口窒窒暗認踏兩船

本報日前獨家踢爆港姐冠軍朱晨麗與港男冠軍李晉強撻着，兩人更在港鐵車廂卿卿我我，但她昨日出席無綫新春團拜時卻親口證實與「老外」男友古思宇仍未分手，明顯暗示一腳踏兩船！

應屆港姐冠軍朱晨麗與港男冠軍李晉強年初三時被本報獨家拍得在港鐵車廂煙韌，除了貼頭交談外，李晉強還拖着朱晨麗坐低，並將頭挨落其膊頭上，一對小情人甜蜜到爆。

不過，朱晨麗昨日出席團拜時被問到是否與李晉強拍拖？她依然否認：「我哋唔係拍拖！嗰日其實約咗一大班朋友食飯，咁啱只係影到我哋兩個啫！」提到李晉強挨在她的膊頭，如此親密的行為只有熱戀的情侶才會做，朱晨麗只說：「佢都答咗佢係『Hea住』咁樣，其實朋友同朋友傾得埋，係唔會有戒心，只係咁啱影到啫！呢啲係拍攝嘅角度問題。」

「正印」未見呷醋

講起「新歡」李晉強全程甜笑，但朱晨麗提起「正印」烏克蘭籍男友古思宇則變臉兼口窒窒！問到是否還與古思宇拍拖，她猶豫地說：「點講呢？……都仲係嘅。」如此看來明顯是「一腳踏兩船」，但朱晨麗仍死撐說：「每個人都會有男仔、女仔朋友，如果只係一齊玩就可以咁講嘅話，仲得了嘅！（咁李晉強係咪追緊你？）吓……朋友嚟啫！呢方面你哋要問番佢喇！（男友睇完報道有冇呷醋？）唔會，大家都會有自己嘅朋友，我相信佢唔會介意。」

朱晨麗強調與李晉強只是正常朋友交往，男友亦沒有要求解畫。提到年初三「斷正」時的驚青樣，朱晨麗說：「因為嗰日冇化妝先咁驚青啫！藝人冇理由唔化妝上鏡嘅。」

樂易玲開綠燈

至於無綫高層樂易玲揚言不會「棒打鴛鴦」，兼贊成兩人拍拖，她笑說：「梗係搵個中國人好，佢又係TVB嘅同事，但係我就唔覺得佢哋拍緊拖囉！」朱晨麗聞言即賣口乖說：「公司不嬲都開通嘅，我哋依家都係朋友階段。」

另一邊廂，正接受藝員訓練班訓練的「男主角」李晉強，日前放學後逼公司巴士後再逼港鐵，往銅鑼灣中華游樂會。沿途所見，他戴着耳機不停講電話，等港鐵時更躲在一邊密密傾，全程滿面春風，莫非與朱晨麗講電話？