君如：開心咪得

吳君如昨晚出席春茗，對於過氣緋聞情人俞琤新春期間與何超瓊十指緊扣在巴黎漫遊，平日搞慣笑的她，即變得強顏歡笑，揚言冇睇報道！

黃百鳴天馬電影公司昨晚於君悅酒店擺春茗，筵開30席，多位演員包括吳君如、熊黛林、陳慧琳、杜汶澤、甄子丹、林峯及鄭少秋等均有出席。

以鮮紅服飾到場的君如，對昔日曾傳緋聞的俞琤於巴黎與何超瓊又翹又拖手，只說：「冇睇報紙，唔回應。唔好問人哋啲嘢啦！我夠成日十指緊扣，同個女，開心咪得！（追龍B，等左右手都十指緊扣？）中醫話我有5%追到，但要抖好身子，我仲有兩套戲要拍，起碼下半年至得閒，我過一日等如人哋過十日，好攰！（向李嘉欣求生仔經？）生仔係一人做事一人當，但我前日拜年見佢健步如飛，着條緊身牛仔褲，或者唔方便講，但真係唔似有咗。」至於李嘉欣昨日亦在微博留言：「的確太敏感！」

而黃百鳴對於《八星抱喜》香港票房暫時落後曾志偉的賀歲片，他說：「《八》內地同星馬票房唔錯，內地有七千萬，過億冇問題，有得鬥，我哋啲戲年年卡士都勁，內地票房都好。（志偉話你唔覆佢？）喺內地宣傳緊，戥佢開心，出年繼續開戲，年年都係志偉鬥百鳴，即係代表有得做，本來四月搵楊千嬅拍《男人如衣服》，佢又坐月又收身，等唔到佢喇，不過個個演員拍埋我度，都有喜事！」

霍震霆聞「做老爺」笑晒

抱恙出席的古天樂說：「之前喺天津拍戲，返嚟即刻病幾日，我係工作狂，一休息就病。」對於兒子霍啟剛與郭晶晶又傳婚訊，問到同場的霍震霆何時做老爺，他四萬咁口說：「你同適當嘅人講！（郭晶晶同你拜年？）我啱啱喺歐洲返嚟，佢哋去英國冇請我。（啟剛買戒指？）你哋清楚過我。」