陳偉霆新年做財神派錢

農曆新年，陳偉霆（William）與詩雅（Michelle）異口同聲表示會抽空陪家人過節，William被親友封為「財神」，皆因開賭局時形同派錢，而Michelle則想燒炮仗，希望新一年事業大爆！

由年頭忙到年底的William與Michelle，踏入龍年，希望好好利用幾日假期陪伴家人，以彌補過去一年對親人的忽略。William表示已為家人安排好一連串賀新春的節目，除向各長輩拜年外，當然少不免開賭局發新年財！問到可有賭運？他透露兒時曾被媽咪封為「運財童子」：「我細個時，阿媽最鍾意抱住我打麻雀，因為我會令佢贏錢。」

荷包遭「洗劫」

長大後，William則被家人封為「財神」，皆因每次開局就算做莊，都會輸到一敗塗地。記得去年他開賭，僅三小時已被家人贏了五位數字，問到是否頓變「最受歡迎男歌星」？他苦笑說：「我都未試過咁多人話鍾意我，我荷包好似被人洗劫咁，又覺得自己同派錢冇乜分別，嗰次我輸到直情要離場，唔敢再玩呀！」

至於Michelle最想在新年燒炮仗，可是近年香港立法禁止，故她已有多年沒有過充滿炮仗聲的新年，她憶述說：「細個時，我哋呢啲住上水區嘅居民好鍾意新年時燒巨型大炮仗，雖然有啲人會覺得危險，但就真係好有新年氣氛！」問到是否想政府放寬政策？她覺得可考慮在遠離市區的地區劃「炮仗區」，方便愛好者玩個痛快。