Twins豪派六位數利是
大忙人Twins和容祖兒忙足一年,終可在農曆新年小休充電!蔡卓妍(阿Sa)直言新年要大覺瞓,鍾欣桐(阿嬌)則希望桃花運來臨,而祖兒要調整身心,為假期後排山倒海的工作做好準備!
容祖兒、阿Sa和阿嬌於今日大年初一以賀年Look跟《太陽報》讀者拜年,祝願大家萬事勝意、身體健康及恭喜發財!對祖兒和Twins來說,放假向來是奢侈的事,難得農曆新年可以抖一抖充電,號稱「英皇龍虎豹」的她們皆感雀躍!不少女星為了Keep Fit而忍口戒食賀年美點,但Twins就趁新年大解放,阿Sa說:「好鍾意食嫲嫲炮製嘅年糕!(怕肥?)都唔怕嘅!(有Quota食多啲?)唔好咁講,最緊要健康啦!」談到新年大計,阿Sa以「瞓覺」行先,她笑說:「趁新年梗係徹底地大覺瞓先,因為真係好攰。(辦年貨?)買盆桔仔,同埋買咗好多別致揮春,好似『贏到開巷』同『旺到飛起』,都幾特別。(買桃花?)今年冇買,反而要攝太歲。」
阿嬌唔要爛桃花
財源滾滾來的Twins,今年大手筆準備六位數字封利是,阿Sa笑說:「公司好多人,依家市道唔好,可唔可以畀個折?」阿嬌即附和:「應該得啩!」至於新年願望,阿Sa表示要身體健康、開開心心及長做長有;阿嬌則說:「最緊要有工開,多勞多得!(要桃花?)桃花運梗係要有,人緣都係桃花呀!(愛情呢?)希望唔好有爛桃花!」
至於在樂壇頒獎禮大豐收的祖兒,再度蟬聯「獎后」殊榮,她展望龍年能繼續保持佳績。據悉祖兒已離港外遊充電,初三才會「啟市」赴內地商演。談及新年願望,她笑說:「有得放假已經實現咗願望,其實最緊要身體健康,因為新年後有排山倒海嘅工作要做,所以呢個新年主要係休息充電。」
阿Sa(左)及阿嬌十分重視桃花運,因人緣也屬桃花。
容祖兒希望有健康的身體應付假期後繁多的工作。