茵然待嫁 情路翠弱

陳茵媺與葉翠翠同是女人三十，一個沐浴愛河卻未有嫁期，一個形單影隻恨雲英未嫁。記得張愛玲說過人生有三恨，一恨海棠無香、二恨鰣魚多刺、三恨紅樓夢未完……若加上四恨嫁杏無期，對兩位港姐冠軍來說，大抵比寂寞凌遲更痛苦！

女人三十 愛不簡單

其實陳茵媺（Aimee）沒有跟張愛玲一樣，錯愛漢奸胡蘭成，與陳豪拍拖又只得一年，雲英未嫁正常至極。奇怪的是，很多人已認定兩人一雙一對，如同神仙眷侶，故何時結婚生仔，自然成為公眾關心的話題。

可惜「皇帝唔急太監急」，Aimee由始到終、開口埋口都是「慢慢嚟」，說時一雙翦水明瞳流波轉盼，沒有半點講大話的迹象，換句話說即是陳豪仍未「做嘢」展開迎娶行動！她說：「慢慢嚟啦！我諗結婚都係順其自然好，始終嚟香港主要係工作，希望事業上得到一個位置，當然愛情係重要，但唔會想太多！」

拍拖了解慢慢嚟

有相士曾屈指一算，指雙陳結婚要等到2014年，咪即是兩年後？說到人生大事，Aimee邊傾聽邊笑說：「唔知！真係要慢慢嚟！大家仲未有計劃要慢慢嚟。我成日覺得工作要有計劃，但愛情即使大家啱Key，都需要更多時間去了解對方，呢啲真係要慢慢嚟，唔係依家要諗嘅事！真心講都想大家關係再好啲！」

愛情可以一瞬間擦出火花，感情則要用時間慢慢烘焙，雙陳勁忙，聚少離多，究竟如何維繫感情？Aimee說：「冇呀！忙極都會Send Message，短訊就好似我哋深處嘅秘密，全世界只有我哋兩個人知，但又好平常！唔講呢啲喇，女仔會怕醜o架！」正所謂「醜」婦終須見家翁，Aimee雙親未見其人，已「八」得陳豪委實是個好男人，Aimee說：「其實屋企冇催婚囉，反而係傳媒關注我哋多啲！我爹哋、媽咪都未返嚟香港，所以佢哋（雙親與陳豪）都未見o架！不過，大家應該會覺得佢係一個好嘅男人，大家都知！總之見咗面先算。」

問鼎視后等進步

竹門對竹門，Aimee是否要等到「視后配視帝」才肯嫁人，視后夢未圓又會否是第五恨？她說：「我未到女主角，依家肯定未到呢個位！我覺得香港有鄧萃雯，外國有梅麗史翠普，呢啲係我心目中嘅女主角，亦係我仰慕嘅演員，好戲之人又好有自己性格，佢哋生活會行番自己嘅路，所以我希望可以做到佢哋嘅成就，慢慢進步啦！有排！」又是一句「慢慢嚟」，慢熱的Aimee對甚麼也不着急，孰好孰壞呢？

後記：慢唔晒！

Aimee做甚麼也慢條斯理，其實只是因為做事一絲不苟。她多次請小記食飯，所以打算這餐飯由小記來結帳，便道：「慢慢嚟，我埋單！」但Aimee卻說：「埋咗喇！快快結！」原來有些事情，她從來不慢！

港姐出身的葉翠翠，由參選到入行都充滿戲劇性，杯葛、雪藏、炒股、整容、包養……負面新聞不絕，簡直有趣到可以做電影藍本！傳言歸傳言，現實中的翠翠只是個要求簡單的女流之輩，期望有日找個好歸宿，擇偶條件最緊要專一：「人生最緊要搵到個愛自己嘅人，咩條件、樣貌都唔重要，一定要對我真心，我亦都唔會要求搞個點樣豪華嘅婚禮。」

深信姻緣天注定

翠翠經歷過的戀情雖曾驚天動地，只可惜天地無情，段段感情皆食白果收場！蘇民峰師傅曾批她一生情路坎坷，雖不至於命犯「天煞孤星」，卻跟淚光點點、嬌喘微微的林黛玉有幾分相似，只有木石前盟，獨欠金玉良緣，她說：「由細到大，我都有個幸福嘅家庭，因為我相信自己係好人，上天唔會對我差！」古語有云：「三十而立，四十而不惑，五十而知天命」，翠翠只有三十之齡，卻已頓悟五十之化境：「我相信條命掌握喺自己嘅手裏，要嚟嘅始終會嚟，英文有句話『What is meant for you won't pass you』，意思係話如果係你嘅，你就一定唔會錯過，只係時間未到啫！」

至今仍是剩女之身，翠翠尚未找到其「賈寶玉」，傳聞中的男友高鈞賢看來也只是鏡花水月。再者，要打動神女原來是一場極需耐力的持久戰，她說：「追我要用好長時間！因為我要好花心機先會心動，太冇心思絕對唔會感動到我！」她的字典裏面亦沒有「一見鍾情」，凡事都要由朋友昇華，但有次出席公開場合時差點令這個信念動搖，她說：「嗰次見到有個男仔各方面都好端莊，我第一次有種感覺，覺得呢個人好合眼緣！佢好想攞我電話號碼，但嗰一刻我由於唔夠勇氣，害怕最後會受傷害，所以拒絕咗！」若說沒奇緣，今生偏又遇着他；若說有奇緣，如何心事終虛話？

感激李添勝提攜

雖然現實有如林黛玉般坎坷，但仍不及近日在電視劇《我的如意狼君》中飾演的「傅百慧」般慘絕人寰，這個角色更令她染上戲癮，久久不能抽身，翠翠說：「呢套劇出街後，有好多人讚我演技進步，已經係一個好大嘅鼓勵！其中一場戲仲係監製李添勝特登加畀我，佢有信心我會演到，我知道之後真係好感動！」

後記：內外兼備

翠翠自小對烹調有興趣，更煮得一手好菜，連高難度的西式甜品亦屢次挑戰成功，成為不少女藝人的甜品師傅！她笑言要留住愛人非單靠外表，最緊要溫柔體貼兼且明白事理，若娶得如此嬌妻，夫復何求？