陳豪多得「旺夫」女友 鑽戒有拖冇欠

陳豪與佘詩曼昨日宣傳新劇，提到事業愛情兩得意，陳豪十分滿意，問到女友陳茵媺是否旺他？他甜笑說：「可能啦！」並笑言會買花獎勵對方，鑽戒則「遲啲先」！

新年將至，無綫劇集《4 in love》一班演員佘詩曼（阿佘）及陳豪等昨日到老人院出席活動，又齊齊寫揮春及玩遊戲應節，把歡樂氣氛帶給一班「老友記」！近期密密接Job的陳豪事業愛情兩得意，自言能過「肥年」：「除咗獎項，我覺得今年運程好好，大型嘅廣告拍咗八個，有時揭雜誌成日都見到自己，都覺得有啲唔好意思！我覺得真係十年難得一遇、好好運！（感情呢？）OK啦！（女友旺你？）可能啦！（買咩獎勵佢？）花啦！（鑽戒？）遲啲先！」不過他未肯透露會否帶女友陳茵媺食團年飯，只說：「我一定會帶佢嚟屋企拜年。（佢幫你大掃除？）媽咪幫我執屋。」而阿佘則密密搵真銀，未有時間拜年：「我年初一、二會到內地出席樓盤活動。（搵真銀？）咁啱喺內地接咗啫！不過我冇時間拜年，年初三已經要返橫店繼續拍劇。」

當街除剩孖煙囪

繼劇集《天與地》後，阿佘、陳豪及黃德斌再度合作，阿佘表示不怕觀眾對此組合感到沉悶：「今次我哋係講四個唔同嘅故事，我第一次拍監製戚其義嘅劇拍得咁輕鬆！」而與阿佘飾演一對的陳豪透露二人雖然沒有親熱戲，但他卻有街頭「除褲騷」：「有場戲講我條褲着火，所以我要喺條街度除剩條孖煙囪，都幾尷尬㗎！（冇親熱戲可以推介畀女友睇？）係呀！」為劇集作最後一次宣傳的阿佘即將離港工作，她透露為未能參與《金枝慾孽2》感到可惜：「我好期待同蔡少芬合作，不過個期度唔啱。」

另外，因拍劇而傳緋聞的葉翠翠指重遇韋家雄沒有感到尷尬：「個劇完咗就完咗。（現實中追你？）冇！」不過她表示未有考慮過會否喜歡比她矮的男生，同時又透露已請教蘇民峰師傅如何擺個桃花陣，催旺運程。