千嬅匿入廁所隊可樂

楊千嬅昨日以凸肚黑色Look出席簽名會，默認腹中塊肉是男嬰。為食的她自爆破了大肚婆禁忌，曾匿入廁所飲可樂，又偷食雪糕及飲凍檸茶！

楊千嬅自宣布懷孕後第二度出席公開活動，身嬌肉貴的她獲十多名同事及保安開路，老公丁子高舉家捧場。發福不少的千嬅現雙下巴，縱使老公監場，她仍穿一吋高的高踭鞋，還大爆曾匿入廁所偷飲可樂、食雪糕及飲凍檸茶，破晒大肚婆禁忌，未知是否辣(慶)老公，丁子高在活動中途鬆人。

照鏡當胎教

千嬅承認重了8至10磅，更笑言自己似卡通人物多啦A夢，問到是否懷男胎？她說：「照得唔係好清楚，只知道七成，唔敢講畀大家聽住，因為仲有三成機會，下個月會再照，應該會清楚啲。（照到有啲嘢凸出嚟？）類似啦！（幾時預產期？）年中啦！每次檢查都會改。」問到有否留定床位生仔？千嬅說：「有私家醫生安排好晒，如果早咗會入政府醫院。（政府醫院唔夠床位？）相信政府醫療好妥善，完全唔擔心。（有指你聘請醫生團隊？）唔好信。」她透露最緊要胎教：「呢排成日聽自己啲歌同照鏡，要睇多啲靚嘢。（叫老公行開啲？）佢都OK，但上次做嘢勁望吳彥祖。」