Jeana「廁」激踢冧門嚇傻爆E超蓮

向來不和到出面的「寸嘴胸模」何佩瑜(Jeana)及「爆E超蓮」鍾采羲(Iris),被目睹昨日凌晨夜蒲時狹路相逢「開拖」!據知,Iris一方於洗手間譏笑有人是「整容怪」,令Jeana嬲到手腳並用踢冧廁所門,結果Iris肩膊被撞親!

靠辣火頭出位的「不倒胸」Jeana,與「爆E超蓮」Iris向來有積怨,不時因小事而隔空罵戰,有酒客目睹兩女昨日凌晨於銅鑼灣的樓上夜店爆衝突!據知,原本Jeana與Iris於店內各據一方消遣,未幾即火星撞地球,搞到拆門!

雙方朋友勸交

消息指,Iris與數名姊妹於凌晨時分柴娃娃入洗手間,一班女仔於廁內高談闊論講是非,有人嘲笑:「嘩!個整容怪都嚟咗!」未幾流言已傳到Jeana耳中,嬲到震的她慶到衝到洗手間門口,手腳並用又拍又踢門,嘈到不少酒客紛紛八卦,突然間一聲巨響之下,整道洗手間門被她「踢冧」!站在門後的Iris肩膊被撞親,即時痛到嘩嘩大叫!繼而兩幫人站在爛門邊破口大罵,此時雙方都有朋友上前勸交。未幾大家興致盡消,紛紛走人!

本報記者於凌晨3時到場,但整間酒吧已幾乎冇酒客,及至昨午再到酒吧,洗手間門已被安回原處,但仍留有幾個鞋印!記者昨日致電Iris,問到有傳她與Jeana「開拖」?她說:「佢成個人失控,我真係好驚囉!真係估唔到佢會咁介意人哋話整容,佢都做咗代言人啦!怕咩人講啫?(有冇打算追究?)冇!當佢飲大兩杯,但唔希望有下次囉!(點解唔追究?)間舖係啲朋友開嘅,唔想搞大件事囉!(係咪你笑Jeana整容怪?)我有聽到人講,但唔係我講。(你有冇還拖?)冇!」

「有人嗌救命咪踢門」

至於Jeana昨日接受電話訪問時,承認前晚曾到夜店,但講到與Iris「開拖」,她即說:「咩呀?邊個Iris?」並表示電話冇電匆匆掛線。而其經理人Roy向她了解後回應:「Jeana冇飲醉,佢話廁所有人嗌救命咪踢門囉!之後冇事咪走,佢話唔識廁所啲人!」

鍾采羲(Iris)

綽號:爆E超蓮

年齡:24歲

三圍:35E、24、34

公司︰Jacso模特兒公司

何佩瑜(Jeana)

綽號:嫩版范冰冰

年齡:23歲

三圍:33C、24、34

公司︰GME模特兒公司

追蹤組

肇事現場環境狹窄,洗手間門亦已安回原位,但留下不少鞋印。

肇事酒吧昨日照常營業,未受事件影響。

Iris與Jeana向來有積怨,險些大打出手,睇少一眼都唔得!(資料圖片)

Iris憑「妄攝寫真」出位,開始有人認識。