Eason變跛神三腳撐春晚

經歷了02年「爆蛋」意外後，陳奕迅（Eason）慘變容易受傷的男人。早前弄傷韌帶的他接受兩次手術後，醫生要他停工一季留家休養，有錢都唔賺，但因一早應承出席央視春晚，他坐輪椅飛北京綵排，平日出入更需靠拐杖支撐，多了一隻腳的Eason變成「跛神」！

經歷過男人最痛的「爆蛋」意外後，Eason繼續過度活躍，有時因疏忽搞到傷手、傷腳、失聲兼五勞七傷。前日他飛往北京綵排春晚，驚見他全程以輪椅代步，又變成三腳仔撐着拐杖拐吓拐吓，有「吹神」之稱的他名副其實變成「跛神」。記者致電其經理人，她表示Eason剛做完韌帶手術，理應收起亢奮狀態，留在家中休息，可是因為大早應承央視出席春晚，即使跛住上台，也要負傷上陣：「佢上年踢波，轉身時覺得隻腳隱隱作痛，去睇醫生時，醫生話佢斷韌帶，仲要係斷咗一段時間，可能係Eason大髀肌肉發達支撐得住，所以唔覺痛，佢仲話唔想做手術添，醫生話唔得，建議佢做兩次手術。」

預計三月復工

Eason兩次手術都十分成功，更沒有後遺症，只須多加休息，再加物理治療便可康復，預計三月便可復工。以Eason目前巨星的地位，幾個月輕易吸金千萬元，停工一季會否影響收入？其經理人說：「唔會，公司知佢做手術，所以工作一早編排好晒，唔會影響到佢工作，只不過今次應承咗央視之嘛！」

據知Eason在頒獎禮過後秘密入院接受手術，手術後按醫生吩咐留在家中靜養，故傷口比想像中痊愈得快，不過經過手術後，大腿上水腫未退，比正常的脹了一倍，加上他大腿本身夠粗，所以被大家笑指他成了名副其實的「金剛腿」，十分夠料踢英超！

康復進度理想

對於要靠輪椅代步，Eason說：「其實腿傷康復進度冇問題，我都可以用拐杖撐着走來走去，但醫生怕進出公眾場所人多擠迫，其他人冇留意到我腳傷，驚唔小心踩到，造成影響，所以堅持要我坐在輪椅上，由助理推着出入。到北京後還特別請了一個醫生幫我，大家都好小心照顧我，感覺自己好似皇帝一樣！」

幸而Eason這位容易受傷的男人，有唱開《容易受傷的女人》的王菲傍住綵排，王菲見到他後立即慰問他的腿傷。據知，Eason當晚會與王菲合唱《因為愛情》，其他表演嘉賓還有王力宏、張衞健夫婦、蔡卓妍和胡軍等大牌紅星。