麥貝夷鍾一憲「上床」後速閃

歌手鍾一憲及麥貝夷去年憑《勾手指尾》橫掃不少獎項，兩人組成情侶檔短短數月，即默契十足。但兩人對當初合作時有親密接觸大感尷尬，麥貝夷說：「惟有當佢係男朋友！」

鍾一憲（Jason）及麥貝夷（Karene）去年情侶檔推出合唱歌《勾手指尾》後，即奪得不少獎項。雖然兩人只合作短短數個月，但已默契十足，訪問時更不停互笠高帽，儼如一對真情侶。提到情侶檔要有親密動作，Karene說：「情侶檔就預咗親密，知道同Jason做拍檔嘅時候都覺得OK，因為都識咗幾年，如果同陌生人做拍檔可能冇咁多火花，同埋會再尷尬啲！」雖然Karene早已預料要與Jason有親暱動作，但到了要攬要拖的時候，她不禁大呼尷尬：「最初真係好尷尬！我記得第一次拍短片，我哋要瞓埋喺同一張床度，我咁大個女都未試過同男性朋友瞓同一張床！拍嗰一刻惟有當佢係男朋友，一停機就即刻彈開！我嘅第一次就咁畀咗佢！」

撥髮累拍檔「捱打」

兩人自爆曾嗌交，但從未試過嬲對方多過一日，問到最不滿對方甚麼？Jason即搶答：「最不滿係佢把頭髮！佢成日拎啲頭髮嚟打我！有次影相，佢係咁撥頭髮，我畀佢打咗成4、5巴，搞到我好嬲咁話：『唔好再打我喇吓！』」但Karene表示與Jason相處得很好，唯一不滿是他比自己較貪靚。他倆自認「忟憎一族」，但因為是情侶檔，故有不滿的事會立即解決及互相提點。