黎淑賢冇床位生仔鬧爆港府

黎淑賢（Bonnie）臨盆在即，如今肚大如籮欲催生，可惜私家醫院聲稱冇床位，要她等到年初一捱貴床位生B，深感無奈的Bonnie即怒插港府無能，連累香港孕婦冇位生仔！

生B經驗豐富的亞姐黎淑賢（Bonnie）遇上生仔大難題！仍有兩周預產期的她因肚大如籮，腹中男嬰已重逾7磅，若等到預產期才分娩，胎兒隨時重達9磅。最慘是Bonnie因佗巨B搞到下盤痛到入心入肺，她欲到私家醫院提早開刀，卻被拒諸門外。

Bonnie佗B四周時便向私家醫院Book床位，直到如今不勝負荷，上周便向醫院申請催生，可惜得到的回覆竟是沒有床位，要等到年初一（23日）才能捱貴位生BB，醫生更向她表示除非見紅或有穿羊水的情況下才可以緊急入院，Bonnie無名火起，歸咎港府早前放寬內地孕婦來港生仔政策所致。

千嬅：「咪喺屋企生囉！」

Bonnie昨日途經金鐘Shopping，挺着大肚腳步蹣跚，似是行得相當辛苦，記者事後致電給她，她指希望多走路，務求快點作動生B：「真係冇諗過咁大個肚，所以依家要節食，驚吸收太盛！我真係驚會發生醫療事故，又驚個B太大出唔到，令佢肩周受傷，我又唔想扮肚痛入院喎！」

她怒插政府到現在才亡羊補牢：「特首話會打擊內地孕婦來港生B，之前政府咁配合佢哋，依家搞到香港孕婦冇床位生仔，針唔拮到肉唔知痛，真係好無奈，又唔可以趕佢哋走！」Bonnie愈講愈火：「我已經自負盈虧，唔去公立醫院，一般市民咪仲慘，個個朋友都唔信我冇位生！政府真係嘥氣！」與此同時，Bonnie更在Facebook爆粗狂罵洩憤。

另一邊廂，懷有龍B的楊千嬅昨日接受電話訪問時透露，醫生早已為她準備好一條龍服務，床位亦預約好，認為沒有問題:「如果好Worse嘅話，咪用最古老方法喺屋企生囉！突發都估計唔到，都要生o架!」千嬅又說：「我有專業護士知識，會預計得到到時嘅情況會點，所以會識得去處理。」而今年圈中也有不少女藝人即將生BB，計有陳自瑤、姚嘉妮及郭羨妮等，但眾人對政府這些新措施有甚麼睇法就不得而知。