AnaR.失戀贏友情：Lisa S.陪我度低潮

混血模Ana R.與Lisa S.「鬼聲鬼氣」，由出道至今甚老友，雖然曾有段時間因誤會互不理睬，但始終無損二人感情。在是非多多的模界，二人沒半點互相妒忌之心，只真心為對方高興。

朋友當然重要，嚟香港發展之前，成日周圍飛，好多時一個地方只係逗留兩、三個月，同啲朋友識咗冇耐又要走，好難維繫一段長遠關係嘅友誼、或者發展成為交心嘅朋友。朋友同情人一樣，需要時間去認識同了解，要用個心去對待，而且都講緣分！嚟咗香港發展，識咗Lisa，我哋喺香港係同期出道，所以特別投契。Lisa係我喺模特兒圈入面真正嘅好朋友，係Best Friend。

我當Lisa係姐姐，嚟香港冇耐就一齊住，住咗幾年，一齊經歷咗好多，大家互相照顧，開心唔開心都一齊面對，建立咗好深厚嘅感情。雖然模特兒界競爭劇烈，又多是非，但我哋從來唔會互相妒忌，如果佢嘅工作比較多，我會好戥佢開心，掉轉係佢都會一樣。

互窒係相處模式

我哋已經不分你我，見到對方好都會真心為對方開心，亦會好保護對方。Lisa一直以嚟都係無條件咁支持我，我哋試過因為啲小事而唔睬對方，甚至冇搵大家一段日子，但係當佢知道我同Brian（周立璟）分手，知我一定好唔開心，主動搵番我，陪我度過呢段低潮期。

即使各有各忙，好少見面，但我哋會Keep住搵對方，冇嘢可以影響到我哋嘅感情。我哋有時會互窒，人哋唔知以為嗌交，其實係玩緊，呢個係我哋相處方式。（明日待續）