莊思敏 Jeana 寸你唔起呀？

是敢言？是挑釁？還是腦殘？莊思敏和何佩瑜（Jeana）總是以寸人為本，鬧人為末，向來樂此不疲。莊思敏鬧o靚模鬧到此族群對她避之則吉，Jeana因寸嘴搞到冇朋友，收口作罷，還是依然故我？身在十字街頭，她們有權重新選擇！

自古以來，歷代不少大臣因忠直敢言往往招致殺身之禍，三國時期，驍勇善戰的趙雲同樣因為過於耿直，被劉備貶為打雜將軍，以致無用武之地！向來有碗話碗、有碟話碟的拿督千金莊思敏，秉承古代將士之風，雖然活於廿一世紀弱肉強食的香港娛樂圈，仍本着一副大無畏精神，時刻直腸直肚，她說：「我覺得講嘢冇必要修飾，香港地咁細，好容易喺街度撞到我，我好難見到第二個人就去扮另一個角色，大家喺螢幕上見到嘅我同我真實性格一模一樣，唔能夠當觀眾係傻！」

自細愛駁嘴

小朋友多被父母灌輸「非禮勿言」的觀念，但莊思敏不諱言自己把口由細到大都很衰，見人就寸：「我把口偏賤，鍾意駁嘴，同兩個妹妹都係互寸，對好朋友都係咁，多數知道對方係玩得先會咁，唔驚得罪佢哋！」

在很多人眼中，她永遠都寸到盡，但原來她入行後已「收斂」不少，她笑言每次出席活動的言論，經記者文字修飾後已比她原句「收火」很多，減低殺傷力。

其寸人功力，非一朝一夕，久練寸嘴神功，原來都有好處，她說：「我發覺轉數快咗好多，最近我喺節目《姊妹淘》做主持，感覺自己平時好似久經訓練，反應快啲有着數！」但她亦緊守寸嘴法則第一條，就是「百行孝為先」，逢遇長輩級則全部「寸神」止步！

不滿博上位

莊思敏發功的主要對象，非模莫屬，其「模判官」之名絕對當之無愧！她對模似有不共戴天之仇：「我真係好憎佢哋！佢哋令大家對模特兒有誤解，以前入呢行要有好多標準，例如要有咁上下身高，仲有好多規矩要守，新一代乜都冇做就想上位！」

她跟模劃清界線，直言自己一個模朋友也沒有，就算出席活動撞口撞面都零交流，她認為模整體思想及價值觀都有問題：「佢哋有啲說話計過度過先講出嚟，因為知道講邊個字會有版位、見到報，真係唔該佢哋唔好再話畀人知佢哋係模特兒！」

撐整容有理

莊思敏最初都有留意模新聞，後來發覺這類新聞充斥着廢話及謊言，最終被她棄如草芥！她去年承認接受割雙眼皮及隆胸手術，力撐整容有理，亦無悔隆胸，但仍不忘寸爆有些模敢整容但不敢承認！

封君如偶像

寸寸貢的莊思敏提到偶像吳君如時即恭恭敬敬，眼裏閃過一絲嚮往的神采：「我尊敬佢演技好、口才好，敢於演各類角色，敢言，豪氣！」兩位女中豪傑相遇之時，定必風起雲湧！

能得「寸嘴o靚模」之名，如同奪香港小姐冠軍，Jeana憑一張靈牙利嘴，逐鹿模界，殺退只靠事業線搵食的萬千美眉。可惜這是雙刃刀，傷人出位，傷了別人，Jeana亦為此搞到冇朋友，連識於微時的陳靜（DaDa）也結下樑子，情何以堪？

當局者迷，違心而行萬萬不可，就算冇朋友，又何妨呢？Jeana說：「我從來都唔覺得我寸囉！只係有嗰句講嗰句，呢個世界好多人鍾意將自己本性收埋，唔肯講真心話，我嘅高論都只係想同大家分享，好過顧左右而言他違背良心而行。」

自比王語嫣

武俠小說中，王語嫣在還施水閣中飽覽武學群書，就是因為飽讀而多口，吐露別人武學真章，惹來殺身之禍，Jeana自比王語嫣，強調自己有嗰句講嗰句：「我覺得自己有啲似王語嫣，都係講真說話，如果其他人因為我講錯說話，畀我激親，可以Say Sorry！可惜從來冇人點對點直斥我不是！」講起寸，Jeana愈講愈興奮，道出一大堆寸人好處，粉飾口臭櫥窗，她說：「做人太圓滑真係冇火花，講千篇一律悶嘢大家都冇興趣啦！有火花熱鬧啲，唔通要等年初二放煙花先興奮咩？」

得朋友兩個

Jeana入行兩年，四海之內冇朋友，只有韋彤和La Ying較深交，但她卻不以為然：「我朋友真係唔多，叫得做朋友，就係交心，交唔到心算係朋友咩？我同韋彤Friend到一齊食同瞓；La Ying就畀我好多支持，佢哋都係我交心朋友，交朋友都係重質不重量好！」去年書展上演一幕「Jeana寸爆DaDa之決裂」，往日意，今日癡，昔日好友如同陌路人，盡皆兩忘煙水裏，原來只是一場戲：「我同DaDa仲係好Friend，大家見到彼此新聞會即時SMS對方，平日罵戰都只係劇情需要！」

隆胸靠勇氣

做人要言行一致，Jeana用行動證明跟言論一樣出位，敢於承認整容隆胸：「喺做新八模時已經想整，又見周秀娜天然身材咁靚，考慮一段日子，終鼓起勇氣走去做！不過我美胸唔係淨係得個大，你睇幾靚，啱比例o架！」原來女為悅己者容已經過時，Jeana完美演繹女為自己者隆！

武俠小說迷

小記跟Jeana識於微時，她為人很好，只是有點寸，她是個武俠小說迷，訪問中多次自比王語嫣，小記指這角色是小龍女的真名，登時被她寸：「王語嫣係《天龍八部》o架！」無話可說！