(18)王家敏藐爆 寸亞視收買人命

《2011亞洲小姐競選》候選佳麗昨日在海南島再穿三點式拍外景，(18)王家敏不但繼續黑面，更指亞視要佳麗嚴寒下食風實屬收買人命。

亞視繼前日要亞姐冒嚴寒穿上泳裝浸溫泉後，昨日再移師海灘，要佳麗以三點式上陣拍攝，據知此舉是為了對撼無綫今晚舉行的《2012國際中華小姐競選》。因現場風大兼下着毛毛雨，雖然應了大會「伊人，在水一方」口號，但不少佳麗凍到打冷震，鏡頭前只能強顏歡笑，部分更凍到擺出奇怪甫士。(20)楊鑫婷晒「胳肋底」、(8)張瑋純扮電影金像獎座、(3)井上雪莉不停拋飛碟。越南代表(12)阮艾娟可算病得及時，晨早請假缺席，免食西北風。

「聽到個心唔舒服」

「黑面王」(18)王家敏則不做病貓，改為發火炮轟亞視漠視佳麗健康，藉此解釋有充分理由黑面和嘴藐藐，她說：「我有啲唔開心，亞視有少少唔理我哋健康，其他佳麗都覺得o架！（其他人笑得好開心！）我都有笑！因為啱啱聽到服裝部同事講『執完衫就執骨』，我係中國人嚟o架！聽到個心唔舒服！」

而身材極具睇頭的大熱韓國(1)洪利朱，亦報稱身體不適：「以為海南島好暖，好在韓國零下十幾度都試過，我堅持到！（有乜方法護理身材？）呢樣係遺傳、係天然嘅，但我去到公眾浴堂都覺得自己與別不同！（有冇佳麗打假波？）我唔會(目及)住人個胸咁冇禮貌o架！」

至於陪跑一族(7)劉煥妍，其虎背熊腰身形反而起了天然保暖作用，她堅稱已積極減肥：「我兩星期瘦咗2.5公斤啦！我覺得唔一定要胸大、S身形至叫靚！決賽日會有Magic出現，到時睇啦！」