傅嘉莉開放愛情放生小三

模特兒傅嘉莉一向走乖乖女路線，由入行拍劇集《四葉草》轉戰模界至今八年，鮮有緋聞的她低調處理感情，堅持一套「放生」愛情觀。然而，她對事業相當着緊，去年長期在外國與內地拍廣告，密密掘金，做到冇停手。

愛情：低調

出道時曾被封為「翻版徐子淇」的傅嘉莉（Kelly）拍拖心態隨緣，但每段戀情都長達四、五年，小妮子對工作認真，對感情更甚，更有一套較其他八十後女孩成熟的愛情觀，她直言：「只要佢識返屋企就得，同其他女仔睇戲食飯都冇所謂，最緊要對我係認真嘅！」在她眼中，男人只有一個致命傷，提到「講大話」，她即勞氣地說：「對我講大話即係侮辱我！唔明白有乜嘢唔可以攤出嚟講！」

留私人空間抖氣

器量大的她不介意讓男友跟其他女孩子出街：「你食得多綠豆，都想食吓黃豆啦！我唔介意o架！就算鍾意咗其他女仔都可以同我講，冇所謂o架！仲可以同佢討論吓添！」她明白「真相」醜陋，更知道戀愛最需要的是坦誠相對。惟其胸襟器量之大，令人疑惑會否曾讓第三者得逞介入？她坦言曾被好友「撬牆腳」：「中學嘅時候，嗰陣嘅男友瞞住我，同咗我個Best Friend一齊，嬲咗足足兩年！」但她仍堅信感情需要信任，不喜歡束縛對方，希望互相給予私人空間。

一向甚少緋聞的她希望感情方面保持低調：「畀人影到唔會否認，但我唔會主動講出嚟！」問到上一段戀情如何結束？她說：「分手係我提出嘅，相處五年幾，愛情已經逐漸昇華咗做感情，以前一直都係『We』，我都好想試吓『I』﹗」

鳥倦知還念親恩

現時Kelly在內地的工作量開始增多，甚至超越外國工作的比率。藝人都喜歡北上搵人仔，她亦不例外：「外國同內地嘅酬勞的確好吸引，尤其我係逐個城市、地區收錢，好似我喺日本行騷，行三個城市收三次錢。」雖然在外地賺錢機會多，但在香港長大的她感慨：「去其他地方工作拎到好多經驗，但好少時間陪屋企人！」她希望今年可以突破八位數字收入，置業給家人收租。

鐵娘子搵命博

傅嘉莉工作搏命，不乏驚險的出埠經驗，兩年前她到韓國拍廣告，正值天氣惡劣下大雪，拍攝場地在偏遠山區：「我着住雪紡裙同男主角好浪漫咁騎旋轉木馬，不過天氣好凍，隻木馬仲係鐵造，大髀夾住凍冰冰嘅鐵，啲手指凍到硬晒，啲皮就嚟黏住舊鐵！」幸好一Cut機，工作人員即遞上熱茶，並用暖笠笠的毛巾包住她。