阿Sa秘嫁陳偉霆 杏兒Bosco結婚頂落去

2012年，人人討論世界末日，末日未到，人總要結婚生仔。從中國玄學角度或西方塔羅牌顯示，娛圈今年充滿變化。從玄學角度看，陳偉霆和蔡卓妍必秘婚；塔羅牌則顯示，胡杏兒和Bosco遇上重生牌，拉埋天窗。玄學Vs塔羅，陳子才和神婆Ella大鬥法！

陳偉霆&阿Sa

陳子才：各自命盤都出夫妻宮，同龍年流年相合，極有可能結婚，加上阿Sa龍年沖太歲，感情易有變化，應該唔會分手，有可能結婚。最弔詭係陳偉霆龍年係暗中結婚年，隨時有可能同阿Sa秘婚！結婚指數：★★★★

神婆Ella：副牌好奇怪，睇唔到愛嘅成分，兩人感情唔深，唔會分手，但感情好平淡。男方覺得女方之前嘅婚姻有影響，有啲在意呢件事，感情唔會昇華。結婚指數︰★★

謝霆鋒&張栢芝

陳子才：命盤顯示佢哋復合無望！去年栢芝係天剋地沖年，令佢情緒反覆，佢哋性格好強，所以選擇分開。龍年係霆鋒感情變化年，佢會決定唔復合，感情好難有得掹。而霆鋒龍年底會出現桃花，等到35歲先有真桃花，到時或會再婚！復合指數：★

神婆Ella：塔羅顯示佢哋冇可能復合，因為霆鋒思想成熟，加上佢身邊比較Close嘅人唔會認同佢同栢芝聯絡，佢依家只係為對仔，相反栢芝想有家庭，認為仲可以復合。佢哋感情會有第三者，但第三者係父母或朋友。復合指數︰★

陳豪&陳茵媺

陳子才：陳豪肖豬，龍年亦係佢紅鸞桃花年，顯示佢都想結婚，但茵媺命盤顯示佢2012年未必想結。但佢哋關係或許會更進一步，或會正式同居，但講到要結婚，可能要等到2014年！結婚指數：★★

神婆Ella：兩人相處耐咗發覺唔係咁夾，溝通唔到，陳豪講唔到內心說話畀陳茵媺，所以感情變淡，仲有分手機會。外界因素覺得佢哋天生一對，而且身邊有人叫佢哋唔好分手，所以就算分咗手都唔會公開，表面上仲係情侶。結婚指數︰★

郭富城&熊黛林

陳子才：2012、2013年係Lynn結婚年，佢一直好想結婚，城城龍年係天喜桃花年，好符合結婚條件。城城犯太歲，有機會2012年決定結婚，2013年拉埋天窗！結婚指數：★★★★

神婆Ella：今年都唔會結婚，雙方已經冇晒感情，想分手，而且女方仲對呢段感情好失望，但佢哋分手機會唔大，因為男方太顧慮自己形象同外來因素，就算女方覺得心淡要分手，兩個人分手嘅機會唔會好高。結婚指數︰★

Bosco &胡杏兒

陳子才：2012、2013年係杏兒嘅結婚年，但杏兒呢兩年工作運更強，可能會同Bosco聚少離多。好彩佢哋感情冇問題，應該會有好發展，至於結婚可能就要等到2014年！結婚指數：★★★

神婆Ella：佢哋嘅感情會有變化，因為有一隻重生牌，但睇唔到會分手，而且結婚去到一個新階段。兩人好難相處，而且愛火減少，但感情太耐唔會分手，故希望用另一個方法去維繫呢段感情。難怪杏兒之前公開指Bosco難頂，看來兩人還有排頂落去！ 結婚指數︰★★★★

黃貫中&朱茵

陳子才：呢Pair好明顯，龍年係朱茵紅鸞桃花年，黃貫中犯太歲，所以佢哋絕對有機會結婚，但唔會神神秘秘，會公告天下，等大家替佢哋開心！

結婚指數：★★★★

神婆Ella：今年唔會結婚，感情冇乜大變動，男方大男人，唔會聽身邊人講嘢，就算身邊人催婚都未必會去做，而且黃貫中會有好多崇拜者，女方經常都好擔心有第三者。結婚指數︰★

方力申&Stephy

陳子才：龍年係佢哋結婚年，好符合結婚呢個諗法，加上Stephy遇上紅鸞桃花年，更增加佢哋拉埋天窗機會，至少佢哋會有咁嘅決定。結婚指數：★★★★

神婆Ella：Stephy好想結婚、有小朋友同自己家庭，但小方唔想住，男方覺得女方愛佢多啲，感情上話事，所以冇原動力去結婚，加上佢重視友情多過感情，未捨得唔同啲朋友去玩嘅單身生活，未想改變。結婚指數︰★★

（最高5粒★）