莊思華3車串燒險夾扁

莊思敏妹妹莊思華前晚發生三車連環相撞意外，而孿生妹妹莊思明玩碰碰車又不慎Chok親，難怪大家姐莊思敏高呼好邪！

孿生姊妹莊思華（Mona）和莊思明（Lisa）近日相當黑仔，繼Lisa上周接連食牛肉乾（違例泊車告票）後，Mona前晚駕新車FIAT 500 BY GUCCI途經獅子山隧道時，因收掣不及撞向前車，加上後面的士猛地向前衝，釀成三車連環相撞意外，幸而她只受輕傷！昨日她在電話受訪時說：「真係好險！前面架車突然耷停，後面架的士收唔切掣，我就夾喺中間！好彩傷勢唔嚴重，只係撞親隻腳，架車後面個泵把撞爛晒，聽日就會去錄口供，會拖架車去整！」她亦在微博寫道：「我想我已經小心到不得了……好彩架車仔真係夠硬淨！」

孖妹思明Chok傷

在Mona撞車的同時，Lisa正在主題公園玩碰碰車，竟又不小心Chok親，幸而沒有大礙，難怪大家姐莊思敏亦高呼好邪：「我哋已經還神喇！可能未拜神出真空期，所以兩個妹都出事，我都要小心啲！Mona坐白車入公立醫院，等兩個鐘都冇人理囉！佢見只係隻腳腫咗，就氣沖沖咁走囉！」此外，莊思敏的公司適逢人事變動，連帶工作相應減少，近日專注電台工作及錄影無綫節目《姊妹淘》。