郭羨妮：委屈到喊

曾於外國留學並且大學畢業的郭羨妮原來童年時讀書成績差劣，更曾成為墊底大軍之一，激到母親嘔血！及後她雖發憤讀書，於A-Level考獲1A1B2C，但未被父親認同，令她委屈到喊！

我喺香港出世同長大，屋企係小康之家，我讀到19歲考埋A-Level先移民加拿大。記得小學讀書時成績好差，仲考尾幾，數學成日唔合格，好討厭數字，激到阿媽嘔血，反而阿哥讀書好叻。唔知點解我五年級嗰時發憤，突然好想讀書，上堂仲好鍾意舉手答問題，可能畀哥哥感染啦！之後我考到一間幾好嘅中學，但中一就有3科唔合格，學校要見家長，媽咪都喊晒！但去到中五我又發憤，可能臨近重要考試，學校風氣又好勤力。

撲返屋企溫習

我開始鍾意讀書之後，放學永遠係第一個撲出課室，然後衝返屋企溫書，仲試過校鬧鐘朝頭早起身讀書！嗰陣我覺得每個人都有自己嘅職責，而學生就應該要讀好啲書。我爸爸好嚴厲，相反媽媽比較鍾意獎勵，記得考A-Level時我好努力，考到1A1B2C，成績好好。我返屋企話畀爸爸知，諗住佢會讚我，但佢要求好高，望到我張成績單後，問我做咩考得咁差，當時我真係委屈到喊！考完A-Level後去理工讀物理治療一個學期，因為爸爸想我讀，但讀開文科，所以讀物理治療好吃力，其實呢科有好出路，冇讀依家都覺得後悔。

禁拍拖保成績

由細到大我都好內向、好靜，但唔係自閉，我讀書時好肥、戴眼鏡，又唔出聲，完全唔起眼，小學同中學都係讀女校，所以冇人追，但我冇唔開心，唔拍拖係應該嘅。將來仔女讀書，我都唔會畀佢哋拍拖，男讀男校，女讀女校，唔好Mix埋一齊，因為嗰個年紀應該讀書，拍拖會影響讀書成績。（明日待續）