關心妍抹乾眼淚 唱盡10年功

出道10年的關心妍,是當今樂壇少數的「一棲歌手」,她自嘲沒甚演戲天分,故寧願將全副心血放在歌唱事業上,即使音樂路上波折重重,但跌過哭過後,她毅然重新出發,再踏紅館開騷,與歌迷集體回憶話當年!

今年是關心妍(Jade)出道10周年,正所謂「十年人事幾番新」,她自言除入行頭兩年星途順暢外,之後的音樂路都波折重重,加上轉公司、爭寵及攞錯獎等是非,令她的情緒起伏甚大,她說:「今年係入行第10年,呢條路幾漫長,最順利係頭兩年,之後嗰8年條路兜兜轉轉,好崎嶇,期間『翻新』咗幾次,有時都驚返唔到轉頭,但冥冥中有主宰,翻過8、9次失敗,點都有一次成功。(點捱?)靠信仰同信念,我知道出面有好多唔同聲音,有讚亦有抨擊,我控制唔到其他人嘅諗法,最緊要控制自己個心,做好本分。」

與歌迷集體回憶

「重新出發」這話題雖是老生常談,但對Jade來說則意義重大!闊別紅館舞台8年的她,將於本月20日舉行《關心妍Jade Sings演唱會2012》,與粉絲集體回憶!她說:「每個機會我都當係重新出發,04年喺紅館開咗第一次演唱會後,冇諗過8年後可以再舉行個唱,我覺得係一個奇迹,開到個唱係信念。(對票房有冇信心?)開到騷已經了咗心願!今次個騷係『關心妍集體回憶』,好多Fans都伴住我成長,佢哋有啲已經結婚同有小朋友。」

入行10年,問Jade自覺現時處於甚麼位置,她想也不想便說:「冇特定位置,喺樂壇有個位畀你,已經係一個位置,逼自己要求一個位置,其實幾辛苦!」

專心致志唱好歌

當其他歌手被稱為「幾棲歌手」時,Jade卻堅持當「一棲歌手」,除了曾客串電視短劇及網劇外,她沒有正式當過藝員或影星,非常「專一」!她說:「我入行咁耐,真係做得一瓣,就係唱歌,連遊戲節目都唔多玩。當年歌唱事業低潮時,有人搵我拍嘢,我亦作過取捨,嗰時諗若然做咗唱歌以外嘅工作,將音樂事業放到最後,會唔會影響歌手身份呢?我擔心多方面做得唔好,最後都係專注唱歌。」

其實Jade亦明白演戲能維持人氣及曝光率:「但我本身唔識做戲,夾硬做會好易畀人抨擊,咁又係咪值得呢?明知自己冇乜天分,我寧願跑多幾個騷。依家我專注一瓣,所以要更加認真、準時,畀人覺得有誠意,無論大騷或細騷,每次唱歌都唔可以失準,我從來唔咪嘴,就算病都寧願唔唱,要交足功課,每個Job都使盡十成功力!」

後記犧牲口福操Fit

為了迎接個唱,Jade不但積極練歌及做運動,對飲食亦極為注重,務求以最Fit身形開騷!她最近已戒掉粥粉麵飯、麵包及蛋糕,平時亦多菜少肉,她笑說:「依家仲Fit過我做女嗰陣,要堅持到底!」

戶冊平

跌過哭過,關心妍屢敗屢戰,重新振作再踏紅館。

關心妍當年「肉感」開騷,可惜未獲好評,在樂壇載浮載沉。

相隔八年再開騷,關心妍以性感透視裝舉行記者會,一副戰鬥格!

貴精不貴多的關心妍,專心做「一棲歌手」,以免心多多惹來反效果。

靠信仰走過低潮的關心妍,認為再踏紅館是一個奇迹。