區文詩識整識食派甜頭

歌手區文詩（Angela）與兩名唱作歌手小師妹葉慧婷和迪子老友鬼鬼，三隻「為食貓」經常相約四處「搵食」，今次她們化身為「甜姐兒」，為大家搜羅又靚又令人一試難忘的西式甜品！

今次區文詩、葉慧婷及迪子走入九龍城找尋富有特色的甜品，一些經典甜品只需加上少少新意思，便會立刻變成一道道美得令人驚嘆的藝術品，又或成為令人一試難忘、舌頭「百感」交集的新潮甜品！

談起「食經」，三位「甜姐兒」如開籠雀般滔滔不絕，迪子笑說：「我閒時都會喺網上做資料搜集，睇吓邊度有好嘢食，為咗緊貼最新資料，我差唔多日日都會追睇網站，熱衷程度甚至可以媲美師奶追電視劇咁！」此話一出立刻引起哄堂大笑！

而葉慧婷坦言最愛玩即興：「我最鍾意同朋友搭車四圍去，如果一發現有新嘅甜品店，又或者店內有外表好靚、好吸引嘅甜品，我哋就會即刻殺入甜品店，將啲甜品消滅！」

最叻炮製心太軟

Angela表示她們不但喜歡四處找「甜頭」，更是「甜品達人」，懂得品嘗之餘更懂得自製愛心甜品，她說：「我哋唔單只鍾意食，仲會研究甜品嘅做法，其實『心太軟』係我嘅拿手甜品！」未知嘗過Angela的「心太軟」後，會否立刻「心軟」呢？而迪子則說：「我整嘅曲奇都唔錯㗎！我上年都有用自製嘅薑餅人曲奇作為聖誕禮物派畀公司同事！」葉慧婷與Angela異口同聲讚賞，並說：「迪子手勢好好㗎！佢整啲曲奇餅又香又鬆脆！」

此外，嗜甜的Angela坦言不但愛吃、愛自製甜品，更曾有開甜品店的念頭：「早前我曾經都想同好友Stephy（鄧麗欣）一齊合夥開甜品舖，不過嗰時爸爸勸我，佢話同朋友合夥做生意，好易到頭來為錢反目，所以為咗保留呢段友誼，我最後都係打消呢個念頭！」

店舖A：2382 2938

店舖B：2382 1289