感情有潔癖賈曉晨拒做第三者

憑「味之天使」而為人熟悉的賈曉晨(JJ),拍攝處女劇集《缺宅男女》,惟角色遭吳卓羲欺騙感情,認真慘情!問到會否擔心與電力十足的卓羲傳緋聞,JJ笑言「有啲驚」:「因為佢實在太靚仔!」並力撐他為人簡單兼搞笑,看來相當嗒糖!

由影壇轉戰公仔箱的賈曉晨,在處女劇集《缺宅男女》中飾演富翁謝天華的妹妹,角色備受百般呵護,惟因戀上吳卓羲(Ron)而泛起漣漪,她說:「角色性格好內向,但對Ron一往情深,阿哥驚佢貪我啲錢而唔鍾意!」

雖然為愛豁出去,但最終落得悲劇收場,JJ說:「Ron一開始係為咗激女友鍾嘉欣先同我一齊,其實佢一路都冇鍾意過我,好慘!」猶幸現實生活中並沒遇過感情騙子,她說:「感情上我有潔癖,唔接受第三者,呢種虛情假意更加冇可能!」

擔心傳緋聞

雖然入行近十年,JJ不諱言加入電視圈後才為人認識:「拍咗十年電影都冇咩人識,自從06年參加《美女廚房》,翌年做埋『味之天使』梳打就有人識,電視真係入屋最快嘅途徑。」

問到有否遭三大型男謝天華、苗僑偉(三哥)及吳卓羲電暈時?她竟自爆險遭笑暈:「Ron同天華成日搞爛Gag,三哥就好型,而我就主力畀人笑,哈哈!」她更力撐Ron為人簡單:「唔知點解啲報道寫到佢咁複雜?(擔心同Ron傳緋聞?)有啲驚o架!因為佢實在太靚仔!」

曾出唱片及拍電影的JJ表示最愛拍劇,亦不設性感上限:「唔介意性感,咩都試吓囉!自己最想拍古裝。」既然如此愛拍劇,順理成章應該簽約無綫,但她卻反其道而行:「當然知道親生仔女好啲,但依家間公司咁好,真係唔識揀!」

阿彭

處女拍劇的JJ,希望角色得到觀眾讚賞。

雖然《缺》劇拍畢一年才出街,但JJ希望有好收視。