30歲張敬軒：我仲輸得起

80後的張敬軒，被譽為圈中小富戶，09年自組經理人公司前，原來他已秘密動工在老家廣州興建3萬呎錄音室，投資金額愈滾愈大，最終超支16倍，但現年30歲的軒仔不諱言：「我仲輸得起！」]

喺樂壇10年，好想做一啲對呢個行業有影響力嘅事，所以兩年前已籌備喺廣州開Studio，培育新一代幕後人才。契媽同我媽咪係金蘭姊妹，亦係Studio嘅最大股東，契媽由細睇到我大，覺得我入行太早，冇好似一般後生仔咁玩過，所以畀咗一個實現夢想嘅機會我，投資開一間Studio。我依家先30歲，趁後生博吓，我仲輸得起，好命嘅話，我仲有第二個「30年」去輸。

投資額16級跳

為咗呢間Studio，我過去兩年用咗千幾個小時去開會，加上外國時差，好多時要漏夜開會，連瞓嘅時間都冇。起初錄音室預算只係用300萬，不過有錢人屋企嘅視聽房閒閒哋都幾百萬，所以既然唔係求其開，就要做一間最具競爭力嘅錄音室，最不幸係契媽比我更加癲，一係唔做，做就要做最好，最後搵到一幅38,000呎嘅地嚟起呢間Studio，投資金額亦16級跳，變成近5,000萬！

狂接Job「跑數」

契爺同契媽話佢哋喺我咁嘅年紀，冇咁大膽去挑起呢個樑，所以我都畀契爺、契媽一個決心，簽咗10年死約再加5年生約畀佢兩個。15年後我已經45歲，將我最黃金嘅青春畀錄音室，要同錄音室共同進退。我對呢間Studio好有信心，雖然地方好大，但內地成本始終比香港低好幾倍，就算Studio靠唔到自己業務去維持，我都會用我嘅收入去撐佢，所以我唔可以太低調，要努力工作「跑數」，希望Studio愈做愈好，將來靠佢養老。

後記：乖乖食「長齋」

不少人批評80後及90後不濟，但80後的軒仔，絕對是值得學習的好例子！目標為本的他，要做香港歌手，要在紅館開騷，30歲未夠已懂得為將來鋪路，開錄音室做老闆，清楚知道自己所想。正如軒仔所言，不可以靠樣食飯，論歌藝亦有大把前輩及後浪比他好，唯一「食胡位」是形象健康，故他10年來甘願食「長齋」，不蒲不玩不敢曳，為實現理想，他於未來15年亦不會打爛這個「齋缽」！

（全文完）

口述：張敬軒

筆錄：音樂組