梁朝偉開口恨中獎生龍B

梁朝偉、劉青雲及周迅等昨晚出席英皇電影《大魔術師》首映禮,偉仔老婆劉嘉玲神秘現身撐老公,為免搶風頭,嘉玲在首映禮儀式完結後才翹着偉仔入場,相當識做!

梁朝偉及劉青雲等昨晚偕導演爾冬陞、英皇集團主席楊受成、陳偉霆及鍾舒漫等,出席英皇電影《大魔術師》群星首映禮。席間,「英皇慈善基金」捐出10萬港元予「願望成真基金」,助病童完成心願!

儀式完結後,嘉玲悄悄現身,更翹實偉仔步入戲院晒恩愛,引起全場哄動,需出動保安維持秩序。結婚多年的偉仔被問到何時做爹哋?他說:「一切隨緣啦!(考慮人工受孕?)隨緣啦!(心急?)呢啲唔係我想就有,我都想中馬票啦!」雖然未成功造人,但偉仔及嘉玲恩愛如昔。昨日有傳嘉玲以2千多萬元人民幣(約3千萬港元)在上海買豪宅送給偉仔。偉仔坦言未聽過,反而笑問是否是驚喜禮物,但給傳媒踢爆:「相信佢係喺上海換樓,因為嘉玲媽咪喺上海住,就算佢買咗,我都未必會住。」

大時大節互送禮

偉仔每年大節日都會跟嘉玲交換禮物,問到去年送了甚麼生日禮物給嘉玲?偉仔說:「女人嘢!(有平有貴喎!)講心意!(如果收到3千萬豪宅,點回禮呀?)唔好氹我啦!」他又表示經常不在港,故希望農曆新年能留港度過,亦希望如往年到外地滑雪,但因擔心弄傷會影響工作,故近2年都沒有滑雪:「今年仲有部戲『黐身』。(邊部?)王家衛囉!(《一代宗師》?)係,埋尾㗎嘞。」

爾冬陞跟劉青雲日前正於上海拍新片《消失的子彈》,昨晚趕回港出席《大》片首映。提到有傳吳彥祖(Daniel)太太Lisa S.懷孕,爾冬陞坦言有傳短訊給對方,並遭回覆否認,令他大失所望:「我想有個小Daniel嘛!(你有冇喜事公布?)我生?我幾歲呀!」

影視組

嘉玲秘密現身撐場,同偉仔翹到實,相當恩愛。

偉仔(左二)等代表「英皇慈善基金」轉交支票予「願望成真基金」。

英皇集團主席楊受成(右起)、偉仔及劉青雲合照留念。

周迅在台上面對幽默的劉青雲,忍不住微笑。