軒仔愧對Ivana：我虧欠咗佢

張敬軒感情上有感愧對緋聞女友王菀之（Ivana），前車可鑑拒絕再找新女友做代替品，因早已真心視Ivana為女友。

近年不時有斷背新聞，令好多人質疑我性取向問題，有人認為如果唔係事實，你搵個女仔拍吓拖，事情就自然不攻自破！但我呢個人就係唔想咁做，首先我都慶幸我出世喺一個好包容嘅年代；第二，我唔可以因為闢謠而去利用一個人。最好一個例子，就係王菀之（Ivana），佢係我唯一一位緋聞女友，而喺我心入面，我真係視Ivana為自己女朋友，因為一直以嚟，我覺得對佢好唔Fair，虧欠咗呢個女仔。

當年我同Ivana一齊出道，大家都好鍾意音樂，老土講句志趣相投，之後被周刊影到我哋食飯撐枱腳，我哋傳出緋聞就更加順理成章，佢王菀之亦變咗張敬軒嘅「緋聞女友」。

直到今時今日為止，依然有好多人覺得我哋係「襯到絕」一對。亦因為呢個原因，我曾經同Ivana都講過，對佢有種愧疚之心，好似利用咗佢，畀人覺得你唔係同人拍拖，就應該講清楚，咪成日製造煙幕。

互窒互嗲顯默契

無可否認當年大家新人，唱片公司覺得有一啲冇乜殺傷力嘅緋聞最好，大家新人叫價力弱，所以一對人出擊，就好似當年張智霖同許秋怡一樣「情侶檔」受歡迎。當年同一間公司一齊做騷，我哋唔使綵排，你窒我一句，我又駁你一句，不論台上台下都默契十足。

雖然我哋依家唔同公司，少咗合作機會，但我同Ivana係有種好難解釋嘅情感。點解又唔能夠再進一步變成「真情侶」？可能我哋早已經定格喺屋企人，佢會嗲吓我，我又會蝦吓佢，呢個係我哋相處方式，但實際要用一個名詞嚟形容我同Ivana，會係朋友、知己定係其他，我答唔到你，我相信Ivana都一樣。（明日待續）