祖兒感動到喊擁抱鼓勵

「獎后」容祖兒前晚延續不敗神話，七度奪「叱咤樂壇女歌手」金獎，其好友何韻詩更愈鬧愈成功，罵出女歌手「銅獎」，祖兒亦自爆被阿詩台上的言論感動到喊。

祖兒和阿詩兩位好友前晚在《2011年度叱咤樂壇流行榜頒獎典禮》獲得滿意成績，祖兒繼續破紀錄贏女歌手金獎「封后」，雖然早前何韻詩炮轟商台機制，但最終仍獲商台頒女歌手銅獎，而宣布賽果一刻，祖兒更主動拖着阿詩的雙手打氣，其後祖兒獲女歌手金獎時，再次與阿詩握手兼擁抱分享喜悅。

替王菀之緊張

慶功宴上，問到祖兒「拖手打氣」是否替阿詩獲獎緊張？祖兒說：「唔只阿詩，都有替舒文同王菀之緊張。（特登講三個？）唔係啦！我係三個都被感動、三個我都有喊。（怕阿詩食白果？）唔係，我對佢有信心，我講嘢唔叻，就好似有人代我講說話，好有共鳴。（會勸阿詩乖啲？）唔係嘛！邊勸到！」對再次失落「我最喜愛的女歌手」獎，祖兒表示不會失望，因每個獎項都要講緣分。

至於獲銅獎的阿詩，對於最終出席頒獎禮，她說：「新一年啦！呢啲係之前嘅事，唔好再講。（因為傾掂數？）呢個台冇得傾嘅，近年有留意我都知我重點唔係獎項。（祖兒勸你出席？）朋友家人都知我性格，愈叫愈唔嚟，所以唔會叫！」至於祖兒得獎時，第一時間和她握手及擁抱，阿詩稱純屬友情的表現。

雙K互相恭喜

另一邊廂，謝安琪（Kay）和吳雨霏（Kary）前晚各得一獎打成平手，Kay坦言拿「叱咤女歌手」銀獎感意外，並替Kary獲「叱咤十大」高興，而Kary亦謂有在後台恭喜Kay，問是否挑戰天后地位？她說：「唔好咁講，我唔想有咁多是非。」

此外，本報請來時裝判官張學潤評歌手戰衣，他大讚祖兒的華麗孔明燈有9分，阿詩的西班牙鬥牛Look手工靚同獲9分，反而Kay的戰衣僅得4分，Kary的自由女神Look同樣失分；男歌手以黃貫中的虎紋褸穿出Band佬味居首位，潮人陳奕迅和周柏豪同告髮色失守。