張敬軒：同Kenny係「雙基」

歌手張敬軒與關智斌（Kenny）的「斷背情」傳足五年，最疑幻似真的是，他們面對緋聞採開放式態度，每每能輕鬆見招拆招，最抵死是軒仔沒想過要終止緋聞關係，全因他與Kenny一起，確實「雙基（商機）無限」！

若果要張敬軒去形容同關智斌嘅關係，我會話係一個噩夢……哈哈，講笑啫！其實係一個誤會，只有我同Kenny先明嘅，個誤會完全唔會解得開，但又誤會得幾開心。其實呢個誤會可以話係「雙基（商機）無限」，試過有不下六、七個商場騷主動要求我哋孖住做。單從公司角度出發，梗係諗點樣利用呢個關係，總之件事唔係去到太負面、太離譜，公司都唔會要我哋避嘅。而且我同Kenny公司啲同事都好好朋友，兩間公司有商有量下合作，既然客戶畀得起酬勞，要我哋合照又有乜所謂？

唔刻意「搵」女朋友

前一年我同Kenny就試過幫電影《葉問前傳》宣傳，仲一齊喺尖東海旁耍詠春添！不過，齣戲開拍時，Kenny撞期拍唔到，我就客串咗個角色。難得一齊「雙基無限」，到呢個Moment大家都唔介意，亦因為呢個原因，我唔會為咗傳聞而刻意搵個「女朋友」出嚟擋駕，Kenny都一樣。

老實講，有冇啲客戶好抗拒我哋所謂「呢啲新聞」就唔知，但暫時所見嘅客戶，或者電影公司都唔介意，佢哋情願多啲冇殺傷力嘅花邊新聞，等多啲人關注佢哋產品。之前Kenny通知我，有個從未贊助過藝人嘅男士服裝，決定贊助我同佢，令我好意外。

畀人認定係「斷背」，我會套用陳志雲金句：「假的真不了，真的假不了。」縱使身邊有唔少同志朋友，但唔覺得有問題，我真正心入面諗嘅嘢，真心認為冇需要向傳媒或者公眾交代，交代只會引伸另一個話題同壓力，有啲事對自己嚟講係應該保留私隱。將來結婚又好，生BB又好，我都會做，但現階段開心就可以。

「摸下面」只係老友

香港係一個中西文化共融嘅地方，畀人覺得思想同言論開放，但好多時口話接受，但實際又係另一回事；好似女仔着低胸短裙，呢頭話人靚，轉頭就批評暴露，反而內地人簡單得多，就算男同男、女同女瞓大髀、摸下面，都只係一種好老友嘅表現，冇人會用「基」嘅角度去睇。如果唔係見到兩個人喺張床嗰刻，都唔可以話人！

（明日待續）

Profile

暱　　稱：軒仔、皇上

出生日期：1981年2月1日

出生地點：廣州

簡　　歷：家中獨子，畢業於廣州五羊中學。01年在廣州推出處男碟《Hins'First》，翌年在港推出《Hins My Way》。08年初踏紅館開個唱，十年內經典代表作包括《My Way》、《笑忘書》、《酷愛》、《櫻花樹下》、《相對論》及《壯舉》等。09年自組經理人公司Star Max Entertainment，並在廣州投資三萬呎錄音室。

場地及食物提供：紅磡都會海逸千鶴日本料理

口述：張敬軒　筆錄：音樂組　攝：吳文聰