世界各地買磚頭 任達華：我係成功例子！

投資有道的任達華，物業遍布世界各地，自言是穩陣派的他喜歡在有金融市場的地方買「磚頭」，貪其有完善銀行和法律架構，更豪氣表示買東西沒有Budget，還自認是投資界的成功例子！

我係一個好笨嘅人，投資獲利係因為我唔貪心，唔貪心股票上嘅嘢，我覺得控制權唔喺自己手上，投資唔同打高爾夫球，可以每棍都喺自己手上掌握，只可以話我係個好蠢但好準確嘅投資者，因為我易滿意，唔要求槓桿式去到幾多錢，只要求腳踏實地，超過幾多物業唔重要，最重要係我可以去鍾意嘅地方！例如一啲人有1蚊，會去買價值10蚊嘅嘢，希望槓桿原理，愈滾愈大！但我有1蚊只會買8毫子，一定要有錢剩，我係穩陣派，風險低啲。

買嘢冇限額

投資物業方面，逢有金融市場嘅地方一定要買，例如倫敦、德國、法國、上海、新加坡呢啲城市，揀呢啲地方買，係因為呢度有金融交易所，咁就會有Banking、法律，有股票市場就會有好多人集中，好多外來人會嚟投資。我已經成功咗，幾多地方有物業我唔講，但我係成功例子！唔可以話依家係收成期，亦唔會減到一年拍一部戲，我Keep住工作，唔會退休，得閒會買嘢畀自己，冇限額，要對自己狠一啲！我最近喺印尼買咗間水中屋，間屋喺水中間，我已經有兩條美人魚，就係琦琦同個女，為咗兩條美人魚，我會將水入面嘅珊瑚改成粉紅色，因為佢哋鍾意，可以去自己鍾意嘅地方係好開心嘅事。

買錶愛守時

我又好鍾意買錶，準時好緊要，呢個世界上得兩個人，一個係鄭裕玲，一個係我，冇人夠我哋兩個準時，依家係有人唔守時，但唔關我事，呢個係佢哋嘅生活，如果佢有一日開竅，由唔準時變到準時嘅話，咁恭喜佢啦！同埋男演員去內地拍戲係咪會改變性情，唔關事o架！我都喺內地拍戲咁耐，我就唔會理人哋去做啲乜嘢，我成日覺得我有我態度，同遲到一樣，我永遠都唔會遲到，你遲到你嘅事，我亦都改變唔到你，亦改變唔到我，好多嘢佢哋鍾意係點，等於佢哋嘅做法，唔關我事，我管唔到理唔到。（明日待續）

口述：任達華　筆錄：名人組