Kelly大呻冇咗條腰

陳慧琳（Kelly）昨日任無綫節目嘉賓，對於無綫跟四大唱片破冰，她直言相當開心。佗了5個多月龍B的她身形苗條，但她笑言自己「冇咗條腰」！

自四大唱片跟無綫破冰後，禁足無綫兩年多的Kelly表示能任無綫節目《May姐有請》嘉賓而感開心：「本來搵我做華姐表演嘉賓，不過撞咗我齣新片首映，下次最快再上節目要生完先。我都希望上TVB唱歌、做多啲訪問。」又指TVB原本找她唱歌：「不過撞咗日子，未傾到咁詳細。」

BB執哥哥舊衫

已佗B五個多月的Kelly身形苗條，連早前為節目買的衣服亦過鬆：「今日着起先知太鬆，要改番緊啲！（幾吋腰？）30呀！唔見咗條腰，變咗低腰咁！」而Kelly有份主演的新片將於下月中上映，她表示完成宣傳後要休息待產。對於明年多龍B搶閘出世，她笑說：「上次講完都驚一驚，所以一早訂咗（醫院）。（收費貴？）價錢合理，咁我覺得啲護士都好辛苦嘅。」

對於有指她花費500萬元安胎，Kelly打趣說：「第一個就嚇死我老公啦！其實我冇乜食補品，都係食平民化嘢食，最鍾意食麥皮。」又笑言養囝囝相對便宜：「男仔唔使買咁多衫扮靚，『小龍包』可以着番哥哥啲舊衫！」

Kelly透露兒子蝦餃仔（劉昇）收到大量禮物，連肚中的「小龍包」亦有：「蝦餃仔太多禮物，我都係逐啲逐啲畀佢拆。」問到有否告訴蝦餃仔將為人兄？她說：「遲啲先。（佢見唔到你個肚大咗？）佢都唔睇我個肚嘅，淨係望我塊面。（唔怕佢撞到你？）佢好斯文。」