祖兒打冧Eason攞年度大獎

樂壇天王陳奕迅(Eason)與歌后容祖兒昨晚於《新城勁爆頒獎禮2011》各自橫掃4獎成為大贏家,雙雙創造5連霸奪「全球勁爆歌手」的不敗神話!而祖兒更從Eason手上奪去「年度專輯獎」,吐氣揚眉!

本年度樂壇第一張成績表《新城勁爆頒獎禮2011》昨晚假會展舉行,今屆踏入20周年,新城頒發多達143個獎項!Eason與祖兒5度雄霸「全球勁爆歌手」,祖兒另外3獎是「卡拉OK歌曲」、「勁爆歌曲」,還憑《Joey & Joey》贏埋「年度專輯獎」,Eason都讚祖兒:「終於畀你攞咗我個年度專輯獎啦!」祖兒即抵死捧着獎得戚扭腰,相當風騷!

黎明旗下歌手缺席

Eason憑大熱作品《苦瓜》連奪「年度歌曲大獎」及「播放指數大獎(歌手)」等獎!至於獲3.5獎的方大同緊貼Eason,而未有出席的李克勤、古巨基及盛傳要安胎的楊千嬅依然有獎攞。還以為全城歌手撐場,唯獨黎明為首的Amusic竟「冇影兼冇獎」,今年黎明、衞蘭、李治廷及JW均有新歌派台,去年JW專程從英國返港攞新城的「新人王」,今年竟全軍覆沒!而現場派的場刊中,亦未見Amusic落廣告贊助。Amusic高層王凱文接受電話訪問時否認杯葛新城:「係我哋冇參加啫!(好多歌手冇去都有獎?)我哋一早通知新城有工作嚟唔到,唔覺得係食白果!(場刊都冇贊助?)唔關事,原因好簡單,就係有工作在身!」

Pink Lady打扮的祖兒,在開場歌手大合照時,與何韻詩孖住企兼被安排台下一齊坐。祖兒獨攬4獎,何韻詩、薛凱琪(Fiona)及鄧紫棋(G.E.M.)最多只得兩獎,當中盛傳爭做「環球一姐」的謝安琪(Kay)及吳雨霏(Kary)各有兩獎打成平手,Kary以心口開窿裙上陣,與Fiona及G.E.M.首奪「勁爆女歌手」,關心妍則冧莊攞獎,而Fiona更公開多謝台下的緋聞男友方大同。

Twins獲十年紀念獎

出道10周年的Twins,成員蔡卓妍(阿Sa)及鍾欣桐(阿嬌)分別以紅、黑Look亮相,新城特設「Twins相愛十年大賞」,連同歌曲及跳舞組合等獎項,造就Twins成為組合之霸!男歌手方面,張敬軒、張智霖(Chilam)及梁漢文榮登「勁爆男歌手」,軒仔已是5度奪獎,相反Chilam是首奪此獎。而台灣幫今年只有任賢齊、楊宗緯及張芸京捧場,小齊奪3獎並贏得「亞洲歌手大獎」。總括成績,英皇及環球各奪21獎,第一回合暫時不分勝負。

第一手消息請下載on.cc東方互動iPhone / iPad / Android Apps

音樂組

祖兒與Eason雙雙成為大贏家,風騷得吖!

Twins入行十周年,獲新城頒發紀念大獎。

林峯今年飽受風「霜」,幸未影響樂壇成績。

謝安琪近期聲勢回勇,昨晚自然滿載而歸。

方大同勇奪3.5獎,成績斐然!

與吳雨霏(左)同奪勁爆女歌手的Fiona勁雀躍。

張敬軒(左)及張智霖今年成績不錯,自然不會空手而回。