華哥樂做小男人：冇乜可能嗌交

任達華（華哥）與名模琦琦自97年結婚後一直恩愛，是圈中出名的模範夫婦。華哥坦言對琦琦一見鍾情，婚後相敬如賓，自言適當時候會做小男人，故從未試過嗌交！

同琦琦識咗幾多年？我唔講畀你聽！呢個世界不停轉變，我同佢似啱啱開始咁，因為佢會不停改變自己嚟保持新鮮感。估都估唔到佢今年去做瑜伽，佢從來唔做運動o架！依家收晒身Fit晒，呢樣嘢咪覺得有新鮮感囉！肌膚身形仲係少女咁，唔讚吓佢都唔得！

相處首要坦白

同佢拍拖嗰陣，我仲係喺搏殺期，佢都有成日話夜晚見唔到我，呢個問題係必然存在，惟有靠通電話維繫。識唔識氹太太？我不嬲都係咁，係細心、樂觀嘅人，好似佢好烏龍，成日唔見信用卡，我就會話：「唔緊要，打去Cut咗佢先，或者聽日去番買嘢嗰度搵吓啦！實得o架！唔緊要啦！冇所謂。」我又唔係大男人，我只係細男人！哈哈！又唔係嘅，應該係話我好識得一個男人乜嘢時候去做番啲乜嘢！我覺得養老婆係應該嘅，所以叫佢想買乜就買。琦琦都知我工作好忙，有時候會少咗時間見面，但佢了解明白，我老婆係一個幾Open嘅人，屋企好多零碎事都要辛苦佢，但Family佢處理得好好，教育個女又教得好好。

我相信一見鍾情o架！因為我對琦琦就係！嗰時我睇雜誌有佢做Model嘅相，佢嗰時啱啱入行，喺跨頁出現，個造型係側側哋頭戴帽，我就喺度諗：「個女仔可唔可以成為我女朋友呢？如果可以夢想成真就好啦！」之後出席活動見到佢，交換咗聯絡電話，就係咁偶然嘅機會下認識，夢想成真係件幾得意嘅事，初初見面都冇講佢知喺雜誌見到佢嘅感受，後來先講番畀佢聽。

我同佢一齊咁多年，相處之道就係坦白，同埋最緊要大家有共同嗜好，好多嘢都會開心見誠咁講出嚟。佢有樣嘢好就係容易滿足，呢樣嘢同我最相似，好微細嘅嘢都可以令我覺得好開心！好記得識佢嗰陣，佢好鍾意熊仔，我有一次特登喺巴黎買咗隻好大嘅熊仔畀佢，成個人咁大隻，手提攬住咁拎番嚟畀佢，仲專登買咗個位畀熊仔！佢梗係好鍾意啦！跟住我又用一啲幻想力出咗本叫《心照》嘅攝影書，拎熊仔去加拿大影咗好多相，跟住夾住啲花一次過送畀佢仲同佢講：「熊仔有時可能會搬屋，可能會唔見，但啲相永遠都會喺個File度，你永遠都有呢張相，《心照》呢本書啲相永遠喺度。」佢依家仲擺咗啲熊仔相喺屋企度！

指老婆易滿足

我同佢亦冇試過嗌交，容易滿足嘅人基本上冇乜可能會嗌交，因為好容易覺得好多嘢都OK，可能佢對自己工作上嘅要求好高，但家庭同朋友上就要求好低，啱啱夠就得。

（明日待續）

口述：任達華

筆錄：名人組